Úsh qalada qoqys jaǵatyn zaýyttar salynady

ASTANA. KAZINFORM – Elimizdiń úsh iri qalasynda qoqys jaǵatyn zaýyttar salynady. Bul týraly Úkimet otyrysynda QR Ekologııa jáne tabıǵı resýrstar vıtse-mınıstri Jomart Álıev málim etti.

- Astana, Almaty jáne Shymkent qalalarynda tolyqtaı sheteldik ınvestıtsııalar esebinen 3 qoqys órteıtin zaýyt salý josparlanyp otyr. Bıyl ınvestorlarmen tıisti kelisimderge qol qoıdyq. Investıtsııalardyń jalpy kólemi – 293 mlrd teńge. Qurylys merzimi – 2 jyl, - dedi J. Álıev Úkimet otyrysy qaldyqtardyń barlyq túrin basqarý jónindegi tujyrymdama jobasyn tanystyrý kezinde.

Onyń aıtýynsha, tujyrymdamany tıimdi iske asyrý úshin qaldyqtardy basqarý júıesin ınstıtýtsıonaldyq turǵydan nyǵaıtý qajet. Halyqaralyq tájirıbege sáıkes, «Jasyl damýǵa» qaldyqtardy basqarýdyń Ulttyq ortalyǵy mártebesin berý kózdelip otyr. Ulttyq ortalyq salany tsıfrlandyrý, senimdi statıstıkany qalyptastyrý, qaldyqtyń qozǵalysyn baqylaý jáne bıznes pen ınvestorlar úshin ashyqtyqty qamtamasyz etý baǵytynda jumys isteıdi. Bul qaldyqty basqarýdyń zamanaýı, standarttalǵan jáne tıimdi júıesine kóshý úshin qajet.

Tujyrymdama jobasynda qaldyqty júıeli basqarýǵa kóshýdi kórsetetin mynadaı nysanaly ındıkatorlar kózdelgen:

• radıoaktıvti qaldyqty qospaǵanda, qaldyqtyń barlyq túrlerin 100 protsentke túgendeý; 
• ónerkásiptik qaldyqtardy qaıta paıdalaný úlesin 10 paıyzǵa arttyrý; 
• polıgonǵa jiberiletin kommýnaldyq qaldyq kólemin keminde 10 protsentke tómendetý.

- Osy kórsetkishterge qol jetkizý úshin tıisti is-sharalar jospary ázirlendi. Ony oryndaý ortalyq jáne jergilikti atqarýshy organdardyń kelisilgen jumysyn talap etedi, - dedi vıtse-mınıstr.

Budan buryn habarlanǵandaı, elde kommýnaldyq sektordaǵy qaldyqtardyń 25 paıyzy ǵana qaıta óńdeledi.