Úsh qalada qaıta óńdeýge jatpaıtyn qaldyqtardy kádege jaratý zaýyty salynady

ASTANA. KAZINFORM - Elimizdiń respýblıkalyq mańyzy bar úsh qalasynda qaıta óńdeýge jatpaıtyn qaldyqtardy kádege jaratý zaýyttary salynady. Bul týraly jyl qorytyndysyna oraı BAQ ókilderine arnalǵan brıfıngte Ekologııa jáne tabıǵı resýrstar mınıstri Erlan Nysanbaev aıtty.

- Elimizde jyl saıyn 4,5 mıllıon tonnadan astam kommýnaldyq qaldyq paıda bolady. 2024 jyly qaldyqtardy qaıta óńdeý deńgeıi 25,8 paıyzdy qurasa, 2025 jyly bul kórsetkish 28,6 paıyzǵa deıin ósti. Sonymen qatar, ýtıltólem qarajaty esebinen jobalardy jeńildetilgen qarjylandyrý mehanızmi aıasynda qaldyqtardy basqarý salasynda 63 joba maquldandy. Onyń ishinde 22 joba 89,4 mlrd. teńgege qarjylandyryldy (jalpy 185 mlrd. teńge qarastyrylǵan). 

Bul - qoqys tasymaldaıtyn kólikter, suryptaý jáne qaldyqtardy qaıta óńdeý jobalary, - dedi mınıstr. 

Onyń aıtýynsha, josparlanǵan jobalardy júzege asyrý 2030 jylǵa qaraı qaldyqtardy qaıta óndeý deńgeıin 40 paıyzǵa jetkizýge múmkindik beredi.

- Ruqsat etilmegen qoqys polıgondaryn anyqtaý jáne joıý boıynsha júıeli jumys jalǵasýda. Іshki ister organdarymen birlesken reıdter barysynda 3 myńnan astam zań buzýshylyq anyqtaldy. Sondaı-aq, bıyl ǵaryshtyq monıtorıng arqyly 3 827 qoqys polıgony anyqtalyp, onyń 3 464-i nemese 91 paıyzy joıyldy. 2018 jylmen salystyrǵanda qoqys polıgonynyń sany 45 paıyzǵa azaıdy, bul oń nátıjeniń dáleli, - dedi ol. 

Mınıstr Astana, Almaty jáne Shymkent qalalarynda qol qoıylǵan ınvestıtsııalyq kelisimder aıasynda jalpy quny 293 mlrd teńgeni quraıtyn 3 qaıta óńdeýge jatpaıtyn qaldyqtardy kádege jaratý zaýytyn salý josparlanǵanynaıtty. Qurylys merzimi 2–3 jyl.

- Bıyl biz qaldyqtardy basqarý tujyrymdamasyn ázirledik. Bul qujat qaldyqtardy túgendeýdi, tsıfrlandyrýdy jáne barlyq protsesterge turaqty monıtorıng júrgizýdi kózdeıdi, - dedi Erlan Nysanbaev.

Aıta keteıik, elordada jyl basynan beri 338 zańsyz qoqys orny joıyldy.