Úsh qalada aýrýhanalar ókpeni jeldetý apparatymen tolyq qamtamasyz etilgen
NUR-SULTAN. QazAqparat - Búgingi tańda Nur-Sultan, Almaty jáne Shymkent qalalarynda medıtsınalyq mekemeler ókpeni jasandy jeldetý apparattarymen tolyq qamtamasyz etildi. Jalpy alǵanda bul qalalarǵa 402 ÓJJ apparaty jetkizildi, dep habarlaıdy QazAqparat tilshisi.
Indýstrııa jáne ınfraqurylymdyq damý mınıstrliginiń málimetinshe, Qyzylorda, Almaty, Aqtóbe, Qostanaı, Pavlodar, Aqmola, Qaraǵandy oblystaryna 384 apparat jóneltildi. Jalpy elimizdiń barlyq óńirine 1,5 myń ÓJJ apparatyn jetkizý josparlanǵan.
Bul jospardy 15 qazanǵa deıin iske asyrý kózdelip otyr.
Qazaqstanda memlekettiń qatysýymen ÓJJ apparattaryn «Qazaqstan Aselsan ınjınırıng» JShS (Nur-Sultan Q.) jáne «Tynys» AQ (Kókshetaý q.) sııaqty 2 kásiporyn shyǵarady. Atalǵan kásiporyndar - «Qazaqstan ınjınırıng» UK» AQ ulttyq kompanııasynyń enshiles uıymdary.
Koronavırýs pandemııasyna baılanysty elde qalyptasqan epıdemıologııalyq jaǵdaıǵa oraı ókpeni jasandy jeldetý apparattarynyń jetispeýshiligin eskerip, «Qazaqstan Aselsan ınjınırıng» JShS qysqa ýaqyt ishinde ókpeni jasandy jeldetetin statsıonarlyq apparattar óndirisin ıgerdi.
Al «Tynys» AQ «Kókshetaý-4P» ÓJJ 680 mobıldi apparatyn shyǵarady.
Medıtsına mamandarynyń pikirinshe, apparat qoldanýǵa yńǵaıly ári senimdi jáne elektr qýatyna táýeldi emes.
Kásiporynnyń óndiristik qýaty aıyna 500 ÓJJ apparatyn shyǵarýǵa jetedi.
Odan bólek, «Tynys» AQ ÓJJ portatıvti apparattaryn, «Kókshetaý 3» medıtsınalyq buıymdardyń túrli nomenklatýrasyn, onyń ishinde kóp rettik betperdelerdi, múgedekterge arnalǵan arbalardy jáne t. b. zattardy shyǵaryp jatyr.
Bul kásiporyndardyń negizgi qyzmeti Qazaqstan Respýblıkasynyń jáne ózge de elderdiń Qarýly Kúshteriniń qajettilikteri úshin joǵary tehnologııalyq ónimder shyǵarýǵa baǵyttalǵan. Al ÓJJ óndirisi medıtsınalyq mekemelerdiń qajettilikterin óteýge baǵyttalǵan memlekettik tapsyrys aıasynda jolǵa qoıyldy.
Kásiporyndar qosymsha qajettilik týyndaǵan jaǵdaıda medıtsınalyq tehnıka men kez kelgen ónimdi qajet mólsherde óndirip, jetkize alady.
