Úsh iri qalada jastarǵa 3 myń páter beriledi
NUR-SULTAN. QazAqparat – Jaqyn arada Nur-Sultan, Almaty jáne Shymkent qalalarynda jastarǵa baspana bólý tártibi belgilenedi. Bul týraly Úkimet otyrysynda Indýstrııa jáne ınfraqurylymdyq damý mınıstri Roman Sklıar málim etti, dep habarlaıdy QazAqparat tilshisi.
«Nur-Sultan, Almaty jáne Shymkent qalalarynda jumys isteıtin jastardy baspanamen qamtamasyz etý úshin 2019-2021 jyldary aralyǵynda jylyna 1 myń jaldamaly páter salý josparlanǵan. Memleket basshysynyń tapsyrmasyna sáıkes, jalǵa beriletin turǵyn úı salý men satyp alý úshin qarjylandyrý kólemi jylyna 21,6 mlrd teńgege deıin (3 jyl ishinde 64,8 mlrd. teńge) ósti», - dep túsindirdi mınıstr.
Onyń sózine qaraǵanda, bul qarjy 2019, 2020 jáne 2021 jyldary jumysshy jastarǵa 3 myń jalǵa beriletin páter (Nur-Sultan, Almaty qalalarynda 1050 páter jáne Shymkentte 900 páter) berýge múmkindik beredi.
«Qarjylandyrýdyń ósýine baılanysty biz «Nurly jer» baǵdarlamasyna tolyqtyrýlar engizemiz. Al jastar saıasaty jónindegi ýákiletti organ (Aqparat jáne qoǵamdyq damý mınıstrligi) jaqyn arada turǵyn úı bólý sharttary men tártibin belgileıdi», - dedi Roman Sklıar.
