Úsh halyqaralyq reıtıng boıynsha Qazaqstan 50 kóshbasshy elder qataryna kirdi
ASTANA. QazAqparat - Úsh halyqaralyq reıtıng boıynsha Qazaqstan 50 kóshbasshy el qataryna kirdi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Ekonomıka jáne bıýdjettik josparlaý mınıstri Erbolat Dosaev málim etti.
«Búgin Úkimet otyrysynda faktorlary boıynsha Qazaqstandy halyqaralyq salystyrý jáne elimizdiń básekege qabilettiligin odan ári arttyrý boıynsha qabyldanatyn sharalar men usynystardy qamtıtyn 2013 jylǵy Qazaqstan Respýblıkasynyń básekege qabilettiligi týraly baıandamanyń jobasy qaraldy. Básekege qabilettiliktiń júıeli monıtorıngi bes faktor boıynsha alty álemdik reıtıngtiń jáne ulttyq básekege qabilettilik ındıkatorlary monıtorınginiń qorytyndylary boıynsha Qazaqstan birtindep óz ornyn jaqsartyp keledi», - dedi ol.
Mınıstrdiń atap ótýinshe, 2013 jyldyń qyrkúıeginde jarııalanǵan Dúnıejúzilik ekonomıkalyq forýmnyń Jahandyq básekege qabilettilik ındeksinde Qazaqstan óziniń pozıtsııasyn 1 tarmaqqa joǵarylata otyryp, 148 eldiń ishinen 50-oryndy ıelendi. 2013 jyldyń qazan aıynda jarııalanǵan Dúnıejúzilik Banktiń Doing Business reıtıngisi boıynsha Qazaqstan 3 tarmaqqa pozıtsııasyn jaqsartyp,189 eldiń ishinen 50-orynǵa kóterildi. 2013 jylǵy mamyrda jarııalanǵan Halyqaralyq damý menedjmenti ınstıtýtynyń álemdik básekege qabilettilik reıtıngisinde Qazaqstan óziniń pozıtsııasyn 2 orynǵa tómendetip, 60 eldiń ishinen 34-shi oryndy ıelendi.
«Osylaısha, úsh halyqaralyq reıtıng boıynsha Qazaqstan 50 kóshbasshy elder qataryna kirdi. Eki reıtıng boıynsha 70-tiń ishinde (67 jáne 69-oryn) jáne bir reıtıng boıynsha 140-orynda», - dedi E.Dosaev.
