Úsh erkek pen áıel Aqtóbe turǵynyn urlap áketip, mıllıon teńge talap etti
AQTÓBE. QazAqparat - Kúdiktiler qala turǵynyn kólikke mingizip alyp, kópqabatty úıdegi páterlerdiń birinde qorqytyp, 1 mıllıon teńge talap etti, dep habarlaıdy QazAqparat tilshisi.
Aqtóbe oblystyq polıtsııa departamentine 28 jastaǵy qala turǵyny aryz túsirgen. Aryzda ol ózin urlap, belgisiz adamdardyń aqsha talap etkenin jazdy.
«Jábirlenýshi kórsetken mekenjaıda úsh er adam men bir áıel adam ustaldy. Kúdiktilerden OSA travmatıkalyq tapanshasy, «Mersedes» kóliginen pyshaq pen travmatıkalyq qarý tárkilendi. Aldyn ala belgili bolǵany, jábirlenýshi inisimen qalanyń eski bóliginde júrgen. Sol kezde belgisiz bireýler eki kólikpen kelip, tapansha taqap, mashınaǵa otyrǵyzyp, jaldamaly páterge aparǵan. Sol jerde uryp-soǵyp, 1 mıllıon teńge talap etedi. Tań ata bári uıqyǵa ketkende jábirlenýshi úshinshi qabattaǵy balkon arqyly sekirip, qashqan. Birden oblystyq polıtsııa departamentine kelip, mán-jaıdy aıtyp berdi» dep habarlady oblystyq PD baspasóz qyzmetiniń jetekshisi Erbolat Sarqulov.
Aıta keteıik, qazir Qylmystyq kodekstiń «Adam urlaý» baby boıynsha birneshe saraptama taǵaıyndaldy. Úsh er adam ustalyp, qamaldy.
