Úsh eldiń TJM ókilderi ushqyshsyz ushý apparattaryn qoldaný daǵdylaryn pysyqtady
ALMATY. KAZINFORM — Almaty qalasy men Almaty oblysynda tótenshe jaǵdaılardyń aldyn alý jáne joıý maqsatynda ushqyshsyz ushý avıatsııasyn qoldaný boıynsha halyqaralyq master-trenıng ótti. Bul týraly Tótenshe jaǵdaılar mınıstrligi habarlady.
Bes kúnge sozylǵan sharaǵa úsh eldiń tótenshe jaǵdaılar qyzmetkerleri atsalysty. Qazaqstan, Ázerbaıjan jáne Qyrǵyzstannyń TJM ushqyshsyz ushý apparattarynyń 16 operatory qatysty.
Trenıng baǵdarlamasyna teorııalyq sabaqtar men praktıkalyq jarystar kirdi. Olar 5 negizgi baǵyt boıynsha uıymdastyryldy. Atap aıtqanda, tabıǵı jáne tehnogendik ortada zardap shekkenderdi izdeý, testileý, drondy jınaý jáne sýda izdeý.
Jarys nátıjesinde jeńimpazdar anyqtalyp, elimizdiń qutqarýshylary úzdik nátıje kórsetti.
- Trenıng tájirıbe almasý, vedomstvolar arasyndaǵy jáne halyqaralyq yntymaqtastyqty nyǵaıtý. Sondaı-aq mamandardyń kásibı daıyndyǵyn arttyrý alańyna aınaldy. Nazar ushqyshsyz ushý apparataryn tabıǵı apattardyń saldaryn joıyp, zardap shekkenderdi izdeýden bastap sel aǵyndaryn, qar kóshkinderin, syrǵymalar men sý tasqynyna monıtorıng júrgizýge deıin qoldanýǵa aýdaryldy, - delingen aqparatta.
Buǵan deıin, TJM qyzmetkerlerine kóterme jáne qosymsha tólemder qalaı tólenetinin jazǵan bolatynbyz.