Úsh eldiń jastary Aqtóbedegi kıeli jerlerdi aralaıdy

AQTÓBE. QazAqparat - Aqtóbede «Han Qoryq» jastar festıvali bastaldy. Qazaqstan, Ózbekstan, Reseıdiń jastary birneshe kıeli jerdi aralaıdy, dep habarlaıdy QazAqparat tilshisi.

«QazaqGeography» respýblıkalyq qoǵamdyq birlestigi Aqtóbe oblysy ákimdiginiń jáne Q.Jubanov atyndaǵy Aqtóbe óńirlik memlekettik ýnıversıtetiniń qoldaýymen «Han Qoryq» jastar festıvalin uıymdastyrdy. Jastarǵa tarıhı, mádenı eskertkishterdi tanystyryp, tabıǵı qoryqtar týraly jan-jaqty aqparat berýge baǵyttalǵan festıval elimizde tórtinshi ret ótkizilip otyr. Bıylǵy shara Astananyń 20 jyldyǵyna arnaldy. Festıvalge Qazaqstannyń, Reseı, Ózbekstannyń joǵary oqý oryndaryndaǵy 120 stýdent qatysyp jatyr.

«Jastar Qobda, Oıyl jáne Alǵa aýdandaryn aralaıdy. Máselen, Qobda aýdanynda Keńes Odaǵynyń batyry Á.Moldaǵulovanyń eskertkishine gúl qoıyp, patrıottyq ortalyqqa barady. «Álııa» mýzeıimen tanysyp, batyr qyzdyń týǵan jeri Bulaq aýylyn kóredi. Sonymen qatar, Abat-Baıtaq kesenesine, Qobylandy batyr memorıaldyq keshenine, arheologııalyq eskertkishterge ekskýrsııa júrgizilmek. Oıyl aýdanynda Kókjar jármeńkesin qarap, Barqyn ystyq qumymen júredi. Keıin ataqty tary ósirýshi Sh.Bersıev atyndaǵy mýzeıdi aralap, Alǵa aýdanynda Eset batyr memorıaldyq keshenimen tanysady. Sonymen qatar, QazaqGeography músheleri Aqtobe sý qoımasyn aralaıdy», - dedi QazaqGeography qoǵamdyq birlestiginiń ókili Toǵjan Daýtbaeva.

Festıvaldiń ashylýyna oblys ákiminiń orynbasary Erbol Nurǵalıev qatysyp, jastardyń isine sáttilik tiledi. Stýdentter aldaǵy ýaqytta «Klımattyń ózgerýi» jáne «Sý resýrstary» taqyryptary boıynsha baıandamalar jasaıdy.