Úsh dúrkin álem chempıony pavlodarlyq egizderdiń tusaýyn kesti
«Rýhanı jańǵyrý» baǵdarlamasy aıasynda júzege asqan sharaǵa 500-den astam adam jınaldy, dep habarlaıdy pavlodarnews.kz.
«Qurmetti qyz-jigitter, ulttyń bolashaǵy sizdersizder. Ár qazaqtyń qyzy bizdiń týǵan qaryndasymyz, biz olardyń temir taýdaı qorǵany bolýymyz kerek. Ata-analaryńyzdyń rızashylyǵyn alyńyzdar. Olardy qadirleńizder. Qushaq-qushaq gúldi súıikti qyzyńa ǵana emes, analaryńyzǵa da berip, qýantyp otyryńyzdar. Elge qyzmet etý degen osydan bastalady. Sizder myqty bolsańyzdar, el de myqty bolady», - dedi óńir meımany.
Kezdesý barysynda Ardaq Nazarov qazaq halqynyń birtýar batyrlary, bıler men handardyń ómir joldarynan mysal keltirip, kelgen qaýymdy rýhanı áńgimemen sýsyndatty. Budan keıin álem chempıony Ámir men Nurasyl esimdi uldardyń tusaýyn kesti. Jas balalardyń ata-anasy Ardaqty úlgi tutatyn jandardyń biri eken. Nemereleriniń tusaý kesýinde ájesi shashý shashyp, óńir meımandaryna alǵysyn jaýdyrdy. Osydan soń Ardaq Nazarov «Abylaı» sport klýbyna bardy, jas sportshylarǵa sheberlik saǵatyn ótkizip, aqyl-keńesterin berdi.
«Árbirińizdiń júrekterińizde chempıon bolsam degen arman bar. Ol armanǵa qajyrly-qaırat, tynymsyz eńbekpen ǵana jetesizder. Bilekti birdi, bilimdi myńdy jyǵady degen. Sizder tek zalda ǵana ter tókpeı, kúnine jarty saǵat kitap oqyp ózderińizge paıdaly dúnıelerdi jınaǵandaryń jón. Kúni boıy ınstagramm, Vkontakte jelisinde otyrǵan balalar chempıon bolmaıdy. Eger seniń dosyń osy zalǵa altyda kelse, sen bes jarymda kel. Ol tańerteń eki shaqyrym júgirse, sen úsh shaqyrym júgir. Qolyń bos kezde kitap oqy. Sonda ǵana beles baǵynady, sonda ǵana shyńǵa shyǵasyzdar», - deıdi tanymal sportshy.
Aıta keteıik, Pavlodar oblysynyń aralas jekpe-jek (MMA), pankratıon jáne grepplıng federatsııasynyń prezıdenti Altynbek Rysjanov Ardaq Nazarovqa kúmis qylysh tartý etti. Shara sońynda jas sportshylar kýmırine aınalǵan álem chempıonymen estelik sýretterge tústi. 
