Úsh donor óńirden bıýdjettik alyp qoıýlar kólemi aıqyndaldy
«Memleket basshysynyń bıýdjettik josparlaýdy jeńildetý jónindegi tapsyrmasyn iske asyrý úshin bıýdjetaralyq transfertterdi qysqartý boıynsha jumys bastaldy. Birinshiden, jergilikti bıýdjettiń bazasyna aǵymdaǵy nysanaly transfertterdiń kólemi olardyń nysanaly maqsatyn saqtaı otyryp berilýde. Josparly kezeńde olardyń jalpy sıpattaǵy transfertter kólemindegi úlesi orta eseppen 60 paıyzdy quraıdy. Bul bıýdjettik rásimderdi jeńildetýdi jáne bıýdjet qarajatyn túpkilikti alýshylarǵa ýaqtyly jetkizýdi qamtamasyz etedi. Ekinshiden, zań jobasymen donor-óńirler úshin bıýdjettik alyp qoıýlar kólemin azaıtý jónindegi mindet birtindep sheshilýde. Olar úshin esepteýlerde arnaıy joǵarylatý koeffıtsıentteri qoldanyldy, bul ózindik kiristerindegi alyp qoıýlardyń úlesin 2022 jyly 31 paıyzdan úsh jyldyq kezeńde 18 paıyzǵa deıin tómendetýge múmkindik beredi», - dedi mınıstr «Respýblıkalyq jáne oblystyq bıýdjetter, respýblıkalyq mańyzy bar qalalardyń, astananyń 2023-2025 jyldarǵa arnalǵan bıýdjetteri arasyndaǵy jalpy sıpattaǵy transfertterdiń kólemi týraly» zań jobasyn tanystyra kele.
Onyń atap ótýinshe, bazalyq qyzmetterge teń qoljetimdilikti qamtamasyz etýge qatysty bıýdjetaralyq qatynastardyń negizgi qaǵıdatyn iske asyrý maqsatynda óńirlerdiń erekshelikterin esepke alý boıynsha tásilder qoldanyldy. Bul rette, jergilikti bıýdjetterdiń shyǵystaryn obektıvti esepke alýǵa múmkindik beretin óńirlerdiń áleýmettik-ekonomıkalyq jaı-kúıi arasyndaǵy aıyrmashylyqtardy negizdeıtin salalyq koeffıtsıentter jańartyldy. Bul josparly kezeńde olardyń bıýdjettik qamtamasyz etilýin teńestirý úshin óńirlerdiń aǵymdaǵy shyǵyndarynyń boljamyn orta eseppen 1,1 trln teńgege nemese 23 paıyzǵa arttyrýǵa múmkindik berdi.
«Atalǵan tásilderdi eskere otyryp, zań jobasynda úsh donor óńir – Astana jáne Almaty qalalary, Atyraý oblysy belgilendi. Olar boıynsha bıýdjettik alyp qoıýlar mynadaı kólemderde aıqyndalǵan: 2023 jyly – 432 mlrd teńge; 2024 jyly – 469 mlrd teńge; 2025 jyly – 504 mlrd teńge. Qalǵan 17 óńir boıynsha bıýdjettik sýbventsııalar kólemi 2023 jyly – 5,0 trln teńgeni; 2024 jyly – 5,3 trln teńgeni; 2025 jyly 5,8 trln teńgeni qurady», - dedi Álibek Qýantyrov.
Foto: notilus.es