Úsh chempıon bir kilemde: Astanada Qazaqstan Barysy-2026 ótedi
ASTANA. KAZINFORM — Astanadaǵy Jaqsylyq Úshkempirov atyndaǵy Jekpe-jek saraıynda 15 tamyz kúni qazaq kúresinen mereıtoılyq XV Qazaqstan Barysy-2026 sýpertýrnıri ótedi. Boz kilemde elimizdiń barlyq óńirinen iriktelgen 40 palýan beldesedi, dep habarlaıdy elorda ákimdiginiń resmı saıty.
— Týrnırdiń basty tartysy — ár jyldary altyn belbeý ıegeri atanǵan úsh chempıonnyń kezdesýi bolmaq. Kilemge 2017 jylǵy jeńimpaz Elaman Erǵalıev, 2021 jylǵy chempıon Dáýren Nuralınov jáne 2023 jylǵy bas júlde ıegeri Ǵalymjan Qyryqbaı shyǵady. Olardyń qatysýy bıylǵy jarystyń mártebesin arttyryp, týrnır tarıhyndaǵy eń tartysty dodalardyń birine aınaldyrady, — delingen habarlamada.
Dáýren Nuralınov pen Ǵalymjan Qyryqbaı úshin bul týrnır 2021 jylǵy fınaldan keıingi teketirestiń jalǵasyna aınalýy múmkin. Al Elaman Erǵalıev bul jarysqa jeńisinen toǵyz jyl ótken soń qaıta oraldy.
Qaısar Shámshıdınov — 100 keliden joǵary salmaqtaǵy 2025 jylǵy Azııa chempıony, halyqaralyq dárejedegi sport sheberi ári «Túrkistan Barysy-2026» týrnıriniń jeńimpazy. Ol da bıylǵy dodanyń basty favorıtteriniń biri.
Nurdáýlet Jarylǵapov — Qazaqstan Barysy týrnıriniń úsh dúrkin júldegeri, jankúıerlerge «Qara býra» atymen tanylǵan palýan ári 5-shi Dúnıejúzilik kóshpendiler oıyndarynyń jeńimpazy.
Saıat Shámshıev — Qazaqstan Barysy-2024 týrnıriniń qola júldegeri. Oljas Shynkeev — Qazaqstan chempıony ári halyqaralyq týrnırlerdiń jeńimpazy. Ol sporttyq karerasyn ishki ister organdaryndaǵy qyzmetimen qatar alyp júr. Otan qorǵaýshylar namysyn «Ásker Barysy-2026» týrnırinde birinshi jáne ekinshi oryn alǵan Aıdar Beskempir men Ádil Orazbaev qorǵaıdy.
Aıdar Beskempir — Azııa kýbogynyń jeńimpazy ári Azııa chempıonatynyń júldegeri.
Sonymen qatar, týrnırge óz óńirinde irikteýden ótken palýandar da baq synaıdy. Qazaqstan Barysy-2026 sýpertýrnıri jyldyń eń jarqyn sporttyq oqıǵasy sanalady. Jankúıerlerdi tartysty beldesýler, túrli býyn chempıondarynyń ádis-aıla qoldaný tásilderi men jeńiske degen jigerli sátter kútedi. Bıylǵy barys ári «Taıtuıaq» aýyspaly kýbogynyń ıegeri 15 tamyzda Qazaqstan Barysy sýpertýrnırinde belgili bolady.
Osyǵan deıin Qazaqstan dzıýdo quramasy Qazaqstan Barysy Grand Slam jarysyn tarıhı nátıjemen aıaqtaǵanyn jazdyq.
