Úsh býyndy sot júıesine kóshýge baǵyttalǵan zań qabyldandy - Parlament
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine azamattyq protsestik zańnamany jetildirý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristerdi talqylap, buǵan kelisimin berdi.
Eske sala keteıik, atalǵan zań jobasy negizinen keıbir zańnamalyq aktilerdi Azamattyq protsestik kodeks jobasyna sáıkestendirýge baǵyttalady. Sonymen qatar, senatorlar qujatqa Elbasynyń bes ınstıtýttyq reformasyndaǵy «Memlekettik qurylystyń odan arǵy 100 naqty qadamy» Ult josparyn júzege asyrý boıynsha ózgerister men tolyqtyrýlar engizgen edi. Atap aıtqanda, Ult josparyn júzege asyrýda Memleket basshysy qoldanystaǵy zańnamaǵa úsh býyndy sot júıesine kóshýdi kórsetken bolatyn.
Bul rette zań jobasyna Ult josparyn oryndaý úshin úsh satyly júıeniń qurylý jaǵdaıyndaǵy qylmystyq isterdi qaraýdyń protsestik tártibin qarastyratyn 16-qadam, barlyq sot protsesterin beıne jáne taspaǵa jazý sharalaryn mindetti túrde engizýdi kózdeıtin 20-qadam, alqa bıler soty qoldanylatyn salalardy keńeıtýmen jáne zańdy túrde alqa bıler soty mindetti túrde qarastyrylatyn isterdiń sanattaryn anyqtaýǵa qatysty 21-qadam engizilip otyr. Sonymen qatar, Ult josparynyń 22-qadamynda adamnyń jáne azamattardyń konstıtýtsııalyq quqyn shekteıtin barlyq tergeý qyzmeti jónindegi ókilettikti tergeý sýdıasyna birtindep berýdi qamtamasyz etý arqyly sotta aıyptalýshy jáne qorǵaýshy arasyndaǵy teńgerimdi qamtamasyz etý týraly júktelgen bolatyn. Osyǵan oraı, zań jobasynda atalǵan ózgerister men tolyqtyrýlar qarastyrylyp otyr.
Talqylaý barysynda Májilis depýtattary Senat engizgen ózgeristerge kelisim berip, qujatty qabyldaý týraly sheshim qabyldady. Endi qujat Memleket basshysynyń qol qoıýyna joldanady.
