Úsh birdeı qazaq fılmi «Azııa Oskaryn» jeńip aldy
Avstralııada Asia Pacific Screen Awards azııalyq bedeldi kınosyılyǵy óz jeńimpazdarynyń esimderin jarııalady. Bıyl úsh qazaqstandyq fılm – Ashat Kýchınchırekovtyń «Baýyryna salý», Darhan Tólegenovtyń «Aǵaıyndy» jáne Aısultan Seıitovtyń «Qash» kartınalary júldegerler qataryna endi. Aıta ketetin jaıt - úsh fılm de rejısserlerdiń debıýt jumysy, dep habarlaıdy Kazinform.
Onyń ishinde eki fılm, atap aıtsaq, «Baýyryna salý» men «Aǵaıyndy» Mádenıet jáne aqparat mınıstrliginiń tapsyrysy boıynsha Ulttyq kınony qoldaý memlekettik ortalyǵynyń kómegimen túsirilgen.
«Baýyryna salý» «Úzdik jastar fılmi» nomınatsııasynda jeńiske jetse, «Aǵaıyndy» kartınasynda basty rólderdi somdaǵan Aıbar Saly men Álisher Ismaılov «Úzdik jańa qoıylym» úshin júldege ıe boldy.
Al «Qash» týyndysy «Úzdik operatorlyq jumys» nomınatsııasynda marapatqa ıe boldy.
Al APSA-nyń bas júldesin «Úzdik fılm» nomınatsııasynda áıgili nemis rejısseri Vım Venderstiń «Prekrasnye dnı» atty japondyq kartınasy jeńip aldy.
Bıyl «Sandens» jáne Berlın kınofestıvaline qatysqan, festıvalderdiń hıty bolǵan «Proshlye jıznı» fılmi Selın Sonǵa eń úzdik rejısser ataǵyn ákeldi.
Keshtiń taǵy bir favorıti Rıýsýke Hamagýtıdiń «Zla ne sýşestvýet» japondyq dramasy qazylar alqasynyń Gran-prıine qol jetkizdi.
«Baýyryna salý» fılmi sábı kezinen ájesiniń tárbıesinde bolǵan balanyń oqıǵasyn baıandaıdy.
Týyndynyń tusaýy osy jyly Ispanııanyń San-Sebastıan qalasynda ótken bedeldi kınofestıvalde kesildi, onda ol «Jańa rejısserler» baǵdarlamasynda kórsetildi.
«Aǵaıyndy» fılmi ótken jyldyń qyrkúıeginde Germanııadaǵy Oldenburg International Film Festival festıvalinde «Kıno rýhy» syılyǵyn jeńip alǵan bolatyn, al osy jyldyń sáýir aıynda Qazaqstannyń kınosynshylar qaýymdastyǵy bul kartınany 2022 jyldyń «Úzdik dramasy» dep tanydy.
Sonymen qatar, «Aǵaıyndy» — Italııa, Reseı, Ózbekstan, Qytaı, Ispanııa jáne Bolgarııadaǵy halyqaralyq kınofestıvalderde 10 marapatqa ıe boldy.
«Qash» fılmi qazaq dalasyndaǵy 30-shy jyldardaǵy asharshylyq kezindegi halyqtyń qıyn taǵdyry týraly baıandaıdy.
Qabir qazýshy Isataı óz aýylyn qutqarý úshin qaýipti mıssııaǵa barady, biraq jolda oǵan kezbe adam kezdesip, ony adastyrady.
Aıta ketsek, Aısultan Seıitov jazda Shanhaı halyqaralyq kınofestıvalinde osy jumysy úshin «Úzdik rejısser» nomınatsııasyn ıelengen.
APSA syılyǵy 2007 jyly ıÝNESKO men FIAPF — halyqaralyq kınoprodıýserler qaýymdastyǵynyń kómegimen Avstralııa Úkimetiniń bastamasymen qurylǵan.
Ol jyl saıyn halyqaralyq marapattar arasynda mańyzdy oryn alyp keledi, sóıtip kınematografııa áleminde «Azııalyq Oskar» dep atalady.
Syılyq jyl saıyn Azııa-Tynyq muhıty aımaǵynyń 70-ten astam eliniń ókilderi jasaǵan eń kórnekti kartınalardy atap ótedi.
Ótken jyldar jeńimpazdarynyń qatarynda 2019 jyly «Úzdik rejısser» nomınatsııasynda jeńiske jetken belgili qazaqstandyq rejısser Ádilhan Erjanov bar.
