Úsh bólmeli páter eńbegimen úlgi bolǵan ákege tabystaldy
QYZYLORDA. KAZINFORM - Búgin oblys ákimi Murat Ergeshbaevtyń qatysýymen «Áke tárbıesi – ulttyń rýhanı dińgegi» atty oblystyq ákeler forýmy ótti.
Oǵan «Ákeler odaǵy» respýblıkalyq qoǵamdyq birlestigi tóraǵasynyń orynbasary Bekdaıyr Kúzembaı, máslıhat depýtattary, zııaly qaýym ókilderi, aýdandardan kelgen, túrli salada tabysqa jetip, kásibi men eńbegi arqyly elge úlgi bolyp júrgen azamattar qatysty.
Bıyl ákeler forýmy tórtinshi márte uıymdastyrylyp otyr. Bul – ulttyq qundylyqtardy dáriptep, er azamattyń otbasy men qoǵamdaǵy mártebesin arttyrýǵa baǵyttalǵan mańyzdy alań.
-Prezıdentimiz Qasym-Jomart Kemeluly: «Áke jaýapkershiligi – otbasynyń beriktigi men urpaq tárbıesiniń negizi. Bizdiń qoǵamda ákeniń rólin arttyrý, onyń otbasyndaǵy bedelin nyǵaıtý – óte mańyzdy mindet,- degen bolatyn.
Ulttyń sapasy, bolashaq urpaqtyń azamattyq bolmysy ákeniń bergen tárbıesine tikeleı baılanysty. Jańa Konstıtýtsııamyzda «Neke men otbasy, ana men áke jáne bala memlekettiń qorǵaýynda bolady» dep naqty kórsetilgen. Bul otbasy qundylyqtary memlekettik saıasattyń negizgi ózegine aınalǵanyn aıqyn dáleldeıdi. Áke – tek otbasyn asyraýshy emes, balany jaýapkershilikke, eńbekqorlyqqa jáne Otanǵa degen súıispenshilikke baýlıtyn alǵashqy mektep.
Balanyń bolashaǵyna áser etetin eń qýatty kúsh – otbasyndaǵy tárbıe, ákeniń ónegesi. Sondyqtan, «Adal adam», «Zań men tártip», «Taza Qazaqstan» sekildi memlekettik bastamalardy qoǵamda ornyqtyrý eń aldymen otbasynan bastalýy tıis. Barshańyzdy el múddesine adal qyzmet etýge jáne urpaq tárbıesine zor jaýapkershilikpen qaraýǵa shaqyramyn, – dedi Murat Nálqojauly.
Іs-sharada otbasy qundylyqtaryn nasıhattap, óskeleń urpaq tárbıesine eleýli úles qosyp júrgen ákeler oblys ákiminiń Alǵys hatymen jáne baǵaly syılyqtarmen marapattaldy.
«Ákeler odaǵy» respýblıkalyq qoǵamdyq birlestigi tóraǵasynyń orynbasary Bekdaıyr Nyǵmetuly, ishki ister organdarynyń ardageri Ámirbek Berdibekuly, jas aqyn, respýblıkalyq Ǵanı Muratbaev atyndaǵy jastar syılyǵynyń ıegeri Aqjol Ǵabıtuly, ónegeli áke Dáýlet Amangeldiuly, «Baqytty áıel» jobasynyń spıkeri Nursáýle Dúısembaıqyzy taqyryp aıasynda mazmundy baıandama jasady. «Qazaqstan daýysy – 2023» jobasynyń fınalısi Nurıslam Tileýhan ásem án oryndap, oǵan qoǵamdyq birlestik atynan smart-teledıdar syıǵa berildi.
Forýmda «Qyzylorda» sýpermarketiniń jumysshysy Kamalov Jandos Qudaıbergenulyna úsh bólmeli páterdiń kilti tabystaldy. Jandos Qudaıbergenuly – múmkindigi shekteýli jubaıyna jáne eki balasyna qamqor bolyp otyrǵan ardaqty áke.
