Úsh balasy bar aqtóbelik otbasy shatyr astynda turyp jatyr
AQTÓBE. QazAqparat – Aqtóbede Sahtınder otbasynyń úsh balasy mektepke daıyn emes. Al ózderi qurylysy jartylaı aıaqtalǵan saıajaılyq úıdiń janyna shatyr quryp, sonda turyp jatyr, dep habarlaıdy QazAqparat tilshisi.
Kúz kelgende otbasy tońa bastady. Olarǵa berilgen saıajaı aýmaǵynda qazir gaz, sý, jaryq joq.
«Kúıeýimniń turaqty jumysy joq bolǵan soń ol qara jumysshylardy jaldaıtyn jerge baryp turady. «Qul bazarynan» tapqan aqsha tek tamaqqa ǵana jetedi. Keıde múlde aqsha bolmaı qalady. Al ózim jumys berý agenttigi arqyly adamdardyń páterin jınap, tazalap beremin. Tapqanym 2-3 myń teńge. Ol aqsha da jolaqyǵa, tamaqqa jumsalady. Bizdiń úsh balamyz bar. Úlkeni – 12, ortanshysy - 9, kishkentaıy 5 jasta. Buryn Oıyl aýdanynda turǵan edik. Aýyldaǵy úıimiz sýǵa ketip, keıin turý múmkin bolmaǵan soń jáne jumyssyzdyqtan qalaǵa kóship kelgenimizge 7 jyl boldy. Alǵashqy bes jylda ár aýylda, sharýashylyqta mal baǵyp júrdik. Bergen 60 myń teńgeniń 40 myń teńgesine azyq-túlik alyp, 20 myń teńgeni kıimge jumsadyq. Keıde mal ólip, joǵalsa bizdiń jalaqymyzdan ustap qalatyn», - dedi balalardyń anasy Mıra Baıtýǵanova.
Otaǵasy Nurlybek Sahtın tórt jyl buryn nesıe alǵan. Qazir 150 myń teńge – 380 myń, al Mıra Baıtýǵanova úsh jyl buryn alǵan 200 myń teńge 245 myń teńge bolyp ósip ketken. Olar nesıeni páteraqy tóleý úshin alǵan.
Ákimdik otbasyǵa aýmaǵynda jartylaı aıaqtalǵan saıajaılyq úıi bar jer bergen. Biraq baspana turý úshin qaýipti bolǵandyqtan, qazir januıa shatyr astynda qonýǵa májbúr.
«Qyzym – 8 synypqa, ortanshysy 4 synypqa barady. Al kishkentaıym jeltoqsanda 5 jasqa tolatyn bolǵan soń daıyndyq tobyna aldy. Qalalyq ákimdik 6 sotyq jeri bar saıajaı berdi. Munda beton tóbe jarylyp tur, qulap ketýi múmkin. Qaýiptenip, dalaǵa qonyp júrmiz. Al ataýly áleýmettik kómek alýǵa turaqty jumys kerek. Balalarymdy tastap kete almaǵan soń ornalasa almaı júrmin, al kúıeýime turaqty jumys tabylmaı tur», - dedi M. Baıtýǵanova.
Degenmen, ákimdik úıdiń shatyryn jabýǵa proflıst bergen. Al otbasynyń turmysyn estigen aqtóbelikter aǵash jetkizgen.
«Úıge pesh salyp, ot jaǵamyz. Sebebi, bul jerde gaz joq. Tipti, elektr togy tartylmaǵan. Ol úshin kórshimnen ruqsat alyp, 25 myń teńgeni bólip tóleýge kelistim. Qazir kún sýytty, balalarym aýyra bastady. Olardy mektepke daıyndaıtyn jaǵdaıym joq, kıimderi, oqý quraldary satyp alynbady. Endi ne isteıtinimdi ózim de bilmeımin. Keshke tamaqty erte iship, qarańǵy túskende uıyqtap qalýǵa tyrysamyz», - dedi ol.
Al qala ákimdigi jer ýchaskesi berilgenin, al úıdiń qurylysyn otbasy ózi júrgizýi qajettigin aıtýda.
«Bir aı buryn ákimniń qabyldaýyna kelgen. Úı qurylysyna jer berý máselesin qarastyryp berýin suraǵan. «Qurylysty óz betinshe júrgizemin, tek jer berseńiz jetedi» degen. Jer berildi, rásimdeý jumystary júrip jatyr. Ári qaraı qurylys jumystaryn óz kúshimen júrgizýleri tıis», - dedi qala ákiminiń baspasóz qyzmetinen.
