Úsh balanyń ómirin qıǵan jol apaty: kúdiktige júrgizýshi kýáligin bergender anyqtalyp jatyr

ASTANA. KAZINFORM – Abaı oblysyndaǵy úsh balanyń ómirin qıǵan jol apatyna qatysty  kúdikke ilingen júrgizýshi epılepsııamen esepte turǵanymen, qalaısha júrgizý kýáligi bolǵany tekserilip jatyr. Bul týraly Іshki ister mınıstri Erjan Sadenov aıtty.

Búgin Parlament Májilisindegi baspasóz máslıhatynda tilshiler Abaı oblysynda epılepsııamen aýyratyn adamǵa nelikten júrgizýshi kýáligi berilgenin surady. E.Sadenov atalǵan júrgizýshige kýálik 2006 jyly berilgenin jáne oǵan ruqsat bergender qazir anyqtalyp jatqanyn aıtty.

- Qazir is qozǵaldy. Kúdikti adam qamaýda otyr. Ol kisi týraly BAQ-ta jáne áleýmettik jelilerde túrli málimet tarap jatyr. Atap aıtqanda, qylmystyq is aıasynda bárin naqty tekseremiz. Kýálikti bergen kisini anyqtaımyz. Ony 2000-shy jyldary alsa, kýáliktiń merzimi (jaramdylyq merzimi) bolady ǵoı? Kýálikti (ár 10 jyl saıyn) jańartyp qaıtadan alatyn kezde medıtsınalyq kartany jáne basqa da qujattardy tapsyrady. Osynyń bárin tekseremiz. Eshkim de jaýapkershilikten ketpeıdi, - dedi mınıstr.

Eske salsaq, bıyl tamyz aıynda Abaı oblysy Úrjar aýdanynda 55 jastaǵy Toyota kóliginiń júrgizýshisi rýlge ıe bola almaı, úı qaqpasynyń janynda, joldan 10 metr qashyqtyqta turǵan kámeletke tolmaǵan balalardy qaǵyp ketken.

Polıtsııanyń habarlaýynsha, jol apaty saldarynan eki bala oqıǵa ornynda kóz jumǵan, taǵy bireýi aýrýhanaǵa barar jolda qaıtys bolǵan. Úsh jasóspirim túrli jaraqattarmen medıtsınalyq mekemege jetkizildi.

Júrgizýshi eki aıǵa qamaýǵa alyndy.