Úsh aımaqta múgedektigi bar 800-den astam adamǵa qoldaý kórsetildi
ASTANA. KAZINFORM – QR Mádenıet jáne aqparat mınıstrligi men «Azamattyq bastamalardy qoldaý ortalyǵy» KEAQ qoldaýymen «Qorǵan-M» respýblıkalyq qoǵamdyq birlestigi «Inklıýzıvti qoǵamdy damytý» atty áleýmettik mańyzdy jobany júzege asyrdy.
Bastama aıasynda Túrkistan, Qaraǵandy oblystarynda jáne Shymkent qalasynda 800-den astam erekshe qajettiligi bar azamatqa kómek berildi. 2024 jyldyń naýryzynan 2025 jyldyń qazanyna deıin júrgizilgen baǵdarlama áleýmettik ınklıýzııaǵa baǵyttalǵan keshendi jumystyń tıimdiligin kórsetti.
- Joba aıasynda erekshe qajettiligi bar adamdar ózderin jumyspen qamtý jáne eńbek praktıkasyn damytý úshin óńirlik úkimettik emes uıymdar men bastamashyl toptarǵa 40 shaǵyn grant berildi. Jobaǵa jalpy 2000 volonter men 200 sarapshy atsalysty.
Sonymen qatar 2 áleýmettik zertteý júrgizilip, onyń nátıjesi jergilikti atqarýshy organdar úshin tájirıbe júzindegi usynymdar ázirleýge negiz boldy, - dep jazdy Mádenıet jáne aqparat mınıstrliginen.
«Qorǵan-M» uıymynyń bastamasymen 6 jármeńke uıymdastyryldy. Oǵan 125 erekshe qajettilikteri bar azamat pen 65 jumys berýshi qatysty. Sonymen birge, Enbek.kz platformasynda 6 onlaın-semınar ótkizilip, oǵan 290-nan astam adam qatysty.
«Inklıýzııa daýysy» Telegram-arnasy iske qosylyp, onda aýdıo jáne beıne formattaǵy 20 podkast jarııalandy. Sondaı-aq joba qatysýshylarynyń jetistikterin kórsetetin 2 jınaq jaryq kórdi.
Joba aıasynda erekshe qajettilikteri bar azamattarǵa quqyqtyq jáne áleýmettik máseleler boıynsha keńes berýge arnalǵan Telegram-bot (@inkluzivtik_bastamalar_bot) ázirlendi. Bot arqyly 274 konsýltatsııa kórsetildi.
Osyndaı bastamalar azamattyq qoǵamnyń áleýetin arttyrýǵa, erekshe qajettiligi bar azamattarmen jumys isteıtin ÚEU, bastamashyl toptar men mamandardyń quzyretterin damytýǵa yqpal etedi. Inklıýzııa men áleýmettik ıntegratsııa baǵytyndaǵy jobalardy qoldaý – qoǵamnyń turaqty damýy men jaqsy ómir súrýiniń mańyzdy bóligi.
Aıta keteıik, múgedekti bar balalardyń ata-anasyna qosymsha demalys berý usynyldy.