«Úsh aıdan keıin álem chempıony bolamyn»: Jánibek Álimhanuly málimdeme jasady
ASTANA. KAZINFORM – Qazaqstandyq kásipqoı boksshy Jánibek Álimhanuly (17-0, 12 KO) aldaǵy chempıondyq jekpe-jegine qatysty málimdeme jasap, eki salmaq dárejesinde álem chempıony atanýǵa nıetti ekenin jetkizdi, dep habarlaıdy INFORMSPORTS.
Jánibek Álimhanuly 2027 jyldyń 23 qańtarynda Danııanyń Horsens qalasynda jeńilip kórmegen jergilikti boksshy ıAkob Bankpen (20-0, 11 KO) judyryqtasady. Jekpe-jekte ekinshi orta salmaqtaǵy WBO nusqasy boıynsha bos turǵan álem chempıony ataǵy sarapqa salynady.
Qazaqstandyq boksshynyń aıtýynsha, onyń komandasy qarsylasynyń jekpe-jekterin muqııat zerttep, osal tustaryn anyqtaǵan. Endigi maqsat – sol kemshilikterdi tıimdi paıdalaný úshin tyńǵylyqty daıyndalý.
- Biz qarsylasymyzdy zerttep, onyń osal tustaryn anyqtadyq. Endi aıanbaı eńbek etip, jaqsylap daıyndalatyn ýaqyt keldi. Onyń óz elinde bar kúshin salatynyn bilemiz. Jańa salmaq dárejesi. Jańa deńgeı. Alla qalasa, úsh aıdan keıin eki salmaq dárejesinde álem chempıony bolamyn, – dep jazdy Jánibek Álimhanuly X áleýmettik jelisindegi paraqshasynda.
Aıta keteıik, buǵan deıin Jánibek orta salmaqta óner kórsetken. Endi ol ekinshi orta salmaqta da álem chempıony atanyp, kásipqoı bokstaǵy jetistikterin eseleýdi kózdep otyr.
Al onyń qarsylasy ıAkob Bank te aldaǵy kezdesýde jeńiske jetip, álem chempıony atanýǵa nıetti ekenin málimdegen.
Osylaısha, 23 qańtarda Horsenste ótetin jekpe-jek eki boksshy úshin de mańyzdy synaq bolmaq.
Aıta ketelik Jánibek Álimhanulynyń chempıondyq jekpe-jek aldyndaǵy álsiz tusy anyqtalǵany týraly jazǵan edik.
