Úsh aıda Qazaqstannan Reseıge aqsha aýdarymdary 68,9%-ǵa ósti

ASTANA. QazAqparat - Bıyl birinshi toqsanda qazaqstandyqtardyń Reseıge aqsha aýdarymdarynyń kólemi 48,1 mlrd teńgege jetti, dep habarlaıdy QazAqparat tilshisi ranking.kz portalyna silteme jasap.

Bıyl qańtar-naýryz aılarynda Halyqaralyq aqsha aýdarymdary júıesi arqyly shetelge baǵyttalǵan qarajat kólemi 182,9 mlrd teńgege jetti. Bul ótken jyldyń sáıkes kezeńimen salystyrǵanda 3,5%-ǵa az. Birinshi toqsanda aqsha kólemniń qysqarýy osymen ekinshi jyl qatarynan tirkelip otyr.

Bul rette kerisinshe tranzaktsııalar aǵyny 28,2%-ǵa ósken.

Jalpy, Halyqaralyq aqsha aýdarymdary júıesi arqyly Qazaqstannan eń kóp qarajat kólemi Túrkııaǵa baǵyttalǵan. Bul memleketke qazaqstandyqtar qańtar-naýryz aralyǵynda 54,4 mlrd teńge aýdarǵan. Ótken jyldyń uqsas kezeńine qaraǵanda bul 4%-ǵa kóp.

Odan keıingi orynda Reseı tur. Oǵan birinshi toqsanda 48,1 mlrd teńge aýdarylǵan. Byltyrmen salystyrǵanda ol 68,9%-ǵa artyq.

Úshtikti 32,3 mlrd teńgeni aýdarym somasymen Ózbekstan túıindeıdi. Degenmen bul ótken jylǵa qaraǵanda 15,5%-ǵa az.

Sonymen qatar, Qazaqstannan qarajattyń edáýir kólemi Grýzııaǵa (18,7 mlrd teńge) jáne Qyrǵyzstanǵa (6 mlrd teńge) jiberilgen.

Sáýir aıynyń qorytyndysy boıynsha aqsha aýdarý qyzmetiniń quny bir jylda 0,2%-ǵa ǵana ósti. Byltyr ol 1,3%-ǵa qymbattaǵan bolatyn.