Úsh aıda esirtkiniń taralýyna qatysty myńǵa jýyq saıt buǵattaldy
ASTANA. KAZINFORM – Esirtki jasyratyndar men jetkizip beretinderdi jaldaý boıynsha jasalǵan 4300-den astam habarlandyrý óshirildi. Bul týraly Іshki ister mınıstrliginiń resmı ókili Shyńǵys Alekeshev aıtty.
«Internet arqyly jasalatyn esirtki saýdasyna qarsy turýǵa erekshe nazar aýdarylǵan. Bizde «Kıbernadzor» aqparattyq júıesi bar. Onyń kómegimen esirtki saıttaryn anyqtap, olardy buǵattaý úshin málimetterdi Mádenıet jáne aqparat mınıstrligine jiberemiz. Úsh aıdyń ishinde esirtkiniń taralýy týraly aqparaty bar myńǵa jýyq saıt anyqtalyp, buǵattaldy. Sondaı-aq, esirtki taratatyn ınternet-dúkenderdi anyqtaý úshin Telegram-bot quryldy. Oǵan 2200 qyzmetker qosylǵan. Qazirdiń ózinde 52 iri ınternet-dúken, sonymen qatar jalpy aýdıtorııasy 75 myńnan astam áleýmettik jeli qoldanýshylarynan turatyn 37 bot joıyldy», - dedi Sh.Alekeshev mınıstrliktiń aptalyq baspasóz máslıhatynda.
Onıyń aıtýynsha, qazir jarnama platformalaryn da baqylaý júrip jatqanyn aıtty.
«Budan basqa, «OLX Group» ókildigimen ózara is-qımyl jolǵa qoıyldy. Onda kýrerlik jumystyń atyn jamylyp, esirtki jasyratyndar men jetkizip beretinderdi jaldaý boıynsha jasalǵan 4300-den astam habarlandyrý óshirildi. Ol úshin memlekettik organdar men «OLX» ókilderiniń jáne eriktilerdiń qatysýymen tıisti chat qurylǵan. Bul óz kezeginde zańsyz jarnamany 5 mınýt ishinde joıýǵa múmkindik beredi», - dedi resmı ókil.
