Úsh aıda 3,8 myń jup ajyrasqan
ASTANA. QazAqparat – Birinshi toqsanda 3,8 myń erli-zaıypty zańdy nekesin buzǵan. QazAqparat bul týraly Ulttyq statıstıka bıýrosyna silteme jasap habarlaıdy.
Bıylǵy úsh aıda el óńirlerinde 24,5 myń neke tirkeldi. Bul 2022 jyldyń úsh aıymen salystyrǵanda 10,6% tómen. Nekelesý koeffıtsıenti 1000 adamǵa 5,0 nekeni qurady.
Sondaı-aq osy kezeńde 3,8 myń jup ajyrasqan (AHAT organdarynyń deregi boıynsha sottardyń nekeni buzý týraly sheshimderin esepke almaǵanda). Bul 2022 jylǵy kezeńnen 5,6% az. Ajyrasý koeffıtsıenti 1000 adamǵa 0,79 qurady.
Aıta keteıik, Ulttyq statıstıka bıýrosy 2023 jylǵy 1 sáýirdegi jaǵdaı boıynsha halyq sany 19 832 737 adamdy quraǵanyn málim etti. Onyń ishinde qala turǵyndary – 12 259 453, aýyl turǵyndary – 7 573 284 adam.
