Úsh aıda 100-den kóp banktik aýdarym alǵandar táýekel aımaǵyna túsedi - komıtet
«Bankter jyldam aýdarymdardy engizýmen adamdardyń mobıldi qarjylyq operatsııalarǵa qol jetimdiligin jaqsartty jáne keńeıtti. Degenmen, tek qarapaıym azamattarǵa arnalǵan jyldam aýdarymdar kásipkerlik qyzmette keńinen qoldanyla bastady. Úsh aı qatarynan 100 jáne odan da kóp ártúrli adamnan aýdarym alǵandar táýekel aımaǵyna túsedi. Olar týraly málimetter QR Memlekettik kirister komıtetine beriletin bolady. Óz kezeginde jeke tulǵa tirkeý esebine turyp, salyqtardy aýdara bastaýǵa nemese osy qarajattyń paıda bolýyn túsindirýge mindetti bolady. Tólengen salyqtar mektep salý, zeınetaqy tólemderi, kópbalaly analarǵa kómek kórsetý, eldi abattandyrý sııaqty áleýmettik mańyzdy qajettilikterge jumsalady», - delingen QR Memlekettik kirister komıtetiniń habarlamasynda.
Kásipkerlik qyzmetti júzege asyrýdan tabys alý belgileri bar operatsııalarǵa jatqyzý ólshem sharttaryna bir jeke tulǵanyń qatarynan kúntizbelik úsh aıdyń árqaısysy ishinde 100 jáne odan da kóp ártúrli tulǵalardan kásipkerlik qyzmetti júzege asyrýǵa arnalmaǵan bank shotyna aqsha qarajatyn alýy jatady.
Salyq kodeksi aıasynda 2025 jylǵa deıin ekinshi deńgeıdegi bankter qolda bar sanattardy tolyqtyra otyryp, jeke tulǵalardyń mynadaı sanattary boıynsha málimetterdi Memlekettik kirister organdaryna kezeń-kezeńimen beredi:
1-kezeń (2022 jylǵy 1 qańtardan 2023 jylǵy 1 qańtarǵa deıin) - memlekettik qyzmetshiler men olardyń jubaılary, sondaı-aq olarǵa teńestirilgen adamdar jáne olardyń jubaılary;
2-kezeń (2023 jylǵy 1 qańtardan 2024 jylǵy 1 qańtarǵa deıin) - bıýdjet salasynyń qyzmetkerleri jáne olardyń jubaılary, sondaı-aq kvazımemlekettik sektor sýbektileriniń qyzmetkerleri jáne olardyń jubaılary;
3-kezeń (2024 jylǵy 1 qańtardan 2025 jylǵy 1 qańtarǵa deıin) - zańdy tulǵalardyń basshylary, quryltaıshylary (qatysýshylary) jáne olardyń jubaılary, jeke kásipkerler jáne olardyń jubaılary;
4-kezeń (2025 jylǵy 1 qańtardan bastap) - halyqtyń qalǵan barlyq sanattary.
2023 jyly ekinshi deńgeıdegi bankter jáne bank operatsııalarynyń jekelegen túrlerin júzege asyratyn uıymdar birinshi kezeńnen bastap tulǵalar boıynsha málimetter berýdi josparlaıdy.
Memlekettik kirister komıteti buıryq jeke tulǵalardyń, adal salyq tóleýshilerdiń jeke aýdarymdaryna áser etpeıtinin atap ótti. Bul is-shara salyq monıtorıngin júrgizý kezinde tıimdilikti arttyrýǵa, QR zańnamasynyń normalaryn saqtaýǵa jáne salyq tóleýden jaltarýdan bolatyn zalaldyń aldyn alýǵa baǵyttalǵan.
