Úsh aı boıy zeınetaqysyn almaǵandarǵa tólem ýaqytsha toqtatylady

ASTANA. KAZINFORM — Eger zeınetker jeke shotynan úsh aı boıy tólem almasa, onyń zeınetaqysy ýaqytsha toqtatylýy múmkin.

Bul týraly Eńbek jáne halyqty áleýmettik qorǵaý mınıstrligi Zeınetaqymen jáne áleýmettik qamtamasyz etý departamentiniń ókili Baıan Hasenova aıtty.

— Qazirgi qoldanystaǵy zańnamaǵa sáıkes, eger aqparattyq júıelerdegi málimetterge saı adam belgili bir ýaqytqa elden ketse nemese qandaı da bir sebeptermen uzaq ýaqyt boıy zeınetaqysyn almasa, bankke baryp tólemin talap etpese, zeınetaqy tólemderi toqtatylýy múmkin, — dedi B. Hasenova Úkimette ótken brıfıngte.

Munda tólemderdi tolyq toqtatý emes, tek mán-jaıdy anyqtaǵansha ýaqytsha toqtatý týraly sóz bolyp otyr. Sebepter naqtylanǵan boıda zeınetaqy tólemi qaıta berile bastaıdy.

— Qazirgi ýaqytta zańnamada bul máselege qatysty basqa ereje qarastyrylmaǵan jáne qarastyrylyp jatqan joq. Zeınetaqyny ýaqytsha toqtatý boıynsha ózge norma joq, — dep tolyqtyrdy vedomstvo ókili.

Osyǵan baılanysty azamattarǵa zeınetaqy shotynan qarajatty únemi sheship otyrý nemese zeınetaqy alýǵa áser etýi múmkin jaǵdaılar týraly ýákiletti organdarǵa aldyn ala habarlaý usynylady.

Aıta keteıik, elimizde zeınetaqy da avtomatty túrde taǵaıyndalatyn boldy.

Jumyssyzdyq mártebesi avtomatty túrde anyqtalyp, proaktıvti túrde bos jumys oryndary usynylady.