Úsh aýysymdy mektepter máselesi SQO-da 2025 jylǵa qaraı sheshilmek

ASTANA. QazAqparat – Soltústik Qazaqstan oblysynyń ákimi Aıdarbek Saparov 2025 jylǵa qaraı óńirdegi úsh aýysymdy mektep máselesi oń sheshimin tabatynyn aıtty, dep habarlaıdy QazAqparat tilshisi.

«Áleýmettik salada bilim berý jáne densaýlyq saqtaý basym baǵyt bolyp qala beredi. Biz qalalyq jáne aýyldyq mektepter arasyndaǵy alshaqtyqty barynsha qysqartýǵa, balalarymyzdyń laıyqty bilim alýy úshin jaǵdaı jasaýǵa mindettimiz. Olar qazirdiń ózinde jaqsy nátıje kórsetip otyr. SQO PIRLS halyqaralyq zertteýiniń qorytyndysy boıynsha elimizde ekinshi orynda. UBT nátıjesi boıynsha bizdiń túlekter shekti deńgeıdi eńsergender sany boıynsha kóshbasshylar úshtigine kirdi», - dedi Aıdarbek Saparov OKQ-de ótken baspasóz máslıhatynda.

Onyń aıtýynsha, bıyl oblystyq bıýdjetten bilim berý salasyna 149,9 mıllıard teńge bólingen. Onyń ishinde 49 bilim berý nysanyn kúrdeli jóndeýge 4,3 mıllıard teńge, oqý oryndarynyń materıaldyq-tehnıkalyq bazasyn nyǵaıtýǵa 2,8 mıllıard teńge.

1 qyrkúıekten bastap barlyq mektepterdiń bastaýysh synyp oqýshylary tegin tamaqpen qamtamasyz etiledi. Bul maqsatqa 2,5 mıllıard teńge bólindi. Sondaı-aq, ákim balalardyń qaýipsizdigi erekshe nazarda ekenin aıtty. Jańa oqý jylynda mamandandyrylǵan kúzet pen týrnıketterge 540 mıllıon teńge baǵyttalyp otyr.

A. Saparov baıandaǵandaı, 2025 jylǵa deıin SQO-da 7 mektep, onyń ishinde 2 700 oqýshyǵa arnalǵan «Jaıly mektep» jobasy aıasynda 4 mektep salynady. Bul úshaýysymdy oqytýdy tolyǵymen joıýǵa múmkindik beredi. Bıyl 1 020 oqýshyǵa 3 mektep tapsyrylady.

«Sońǵy 7 jylda alǵash ret Petropavlda jergilikti bıýdjet qarajaty esebinen 420 oryndyq 2 balabaqsha salynady. Bul balalardy mektepke deıingi tárbıemen jáne bilimmen qamtýdy 95%-ǵa deıin jetkizýge múmkindik beredi. Bul maqsatqa 4 mıllıard teńge qajet», - deıdi oblys ákimi.