Úsh aýysymdy mektepter bes kúndik oqý formatyna kóshpeıdi – Ashat Aımaǵambetov

NUR-SULTAN. QazAqparat – Elimizde úsh aýysym boıynsha jumys isteıtin mektepter bes kúndik jumys aptasyna kóshpeıdi. Bul týraly QR Oqý-aǵartý mınıstri Ashat Aımaǵambetov málim etti, dep habarlaıdy QazAqparat tilshisi.

«Bıylǵy oqý jylynan bastap 3 mln-nan astam oqýshy bes kúndik oqý formaty boıynsha bilim ala bastaıdy. Biraq, úsh aýysymdy mektepter bul formatqa kóshpeıdi. Sebebi bes kúndik oqý olardyń bilim berý sapasyna áser etedi. Aldymen úsh aýysymdy mektepterdi eki aýysymǵa kóshirip alý qajet. Jalpy bes kúndik oqý formatyna kóshý máselesi kezeń-kezeńimen júzege asyrylady», - dedi Ashat Aımaǵambetov elordadaǵy №86 mektep-gımnazııada ótken alǵashqy qońyraý saltanatty sharasy barysynda tilshilerdiń suraǵyna jaýap bere turyp.

Mınıstrdiń aıtýynsha, bes kúndik jumys aptasyna kóshý muǵalimderdiń jeke ómirine ýaqyt bólip, sabaǵyna tyńǵylyqty daıyndalýǵa múmkindik beredi.

«Qazirgi ýaqytta elimiz boıynsha mektepterdiń deni bes kúndik jumysqa kóshýge daıyn. Sondaı-aq, bes kúndik oqý tek oqýshylarǵa ǵana emes muǵalimderge de qatysty. ıAǵnı ustazdar da 5 kún ǵana jumys isteıdi», - deıdi A. Aımaǵambetov.

Buǵan deıin atalǵan vedomstvo basshysy 2025 jyly úsh aýysymdy jáne apatty jaǵdaıdaǵy mektepter problemasynyń tolyq sheshiletinin aıtqan edi.

Sondaı-aq, halyqaralyq olımpıadalardyń jeńimpazy atanǵan oqýshylardyń JOO-ǵa tegin túse alatyny týraly habarlaǵan bolatynbyz.

Aıta keteıik, búgin bilim kúnine oraı Ashat Aımaǵambetov elordadaǵy №86 mektep-gımnazııasynda alǵashqy qońyraý saltanatty sharasyna qatysty.