Úsh aýysymdy mektep máselesi qashan túbegeıli sheshiledi
ASTANA. KAZINFORM – Bıyl úsh aýysymdy bilim beretin 92 mektep máselesi sheshiledi. Bul týraly Oqý-aǵartý mınıstri Ǵanı Beısembaev aıtyp berdi.
«Elimizde 8 myń mekteptiń ishinde 106 mektep úsh aýysymda jumys isteıdi. «Jaıly mektep» jáne basqa da jańa mektepter qurylysy arqyly bıyl 92 mektep máselesin sheshýdi josparlap otyrmyz. Byltyr dál osyndaı 29 mekteptiń máselesin sheshtik, kelesi jyly úsh aýysymdy mektep máselesin túbegeıli sheshýdi kózdep otyrmyz», - dedi Oqý-aǵartý mınıstri elordada dástúrli Tamyz sammıtinde.
Sonymen birge, mınıstr búginde 2900-dan astam mektep bir aýysymda jumys isteıtinin atap ótti.
Buǵan deıin sala mınıstri Qyzylorda oblysynda kámeletke tolmaǵan qyzdy jezókshelikpen aınalysýǵa májbúrleý faktisine qatysty pikir bildirgen edi.
