Úsh aýdanda múmkindigi shekteýli balalardy ońaltý ortalyqtary qurylady - Jambyl oblysy
Jambyl oblysynyń ákimi Berdibek Saparbaevtyń tóraǵalyǵymen ótken keńeste múmkindigi shekteýli jandardyń ǵımarattarǵa erkin kirip-shyǵýy, qala ishinde júrip-turýy, ózderin qaýipsiz sezinýleri úshin qoljetimdi ortany qalyptastyrý máseleleri saralandy.
Búgingi tańda oblys boıynsha 46 356 múmkindigi shekteýli azamat bar bolsa, onyń 6629-y balalar. Jumyspen qamtýdy úılestirý jáne áleýmettik baǵdarlamalar basqarmasynyń málimetinshe, bıylǵy jyly jalpy somasy 1,5 mlrd teńgege 9900 múgedekke áleýmettik kómek kórsetilgen.
6629 múmkindigi shekteýli balanyń 659-nyń tirek-qımyl júıesi buzylǵan jáne 1813-i júıke júıesi aýrýlaryna shaldyqqan.
Osy oraıda Taraz qalasy, Jambyl, Qordaı, Merki jáne Shý aýdandarynda mundaı ortalyqtar memleket tarapynan ashylǵan. Al, Turar Rysqulov jáne Jýaly aýdandarynda memlekettik áleýmettik tapsyrys aıasynda úkimettik emes uıymdar arqyly qyzmetter kórsetilýde. Bul aýdandarda ǵımarat máselesi sheshilmegendikten, ortalyqtar jalǵa alynǵan, tıisti jaǵdaı jasalmaǵan nysandarda ornalasqan.
Berdibek Saparbaev eki aýdan ákimine tıisti ǵımarattardy tabý kerektigin eskertti.
Sondaı-aq, Talas aýdanynda osyndaı ortalyqqa ǵımarat satyp alýǵa jergilikti bıýdjetten 21 mıllıon teńge bólingen. Endigi kezekte Ońaltý ortalyqtaryn Baızaq (201 bala), Moıynqum (44 bala), Sarysý (100 bala) aýdandarynda ashý qajettigi týyndap otyr. Berdibek Saparbaev úsh aýdan ákimine qajetti qarajat kózderin qarastyryp, ýaqyt sozbaı ortalyqtardy ashýdy tapsyrdy.
Salalyq basqarmanyń málimetteri boıynsha, múgedekterdiń qoljetimdiligin qamtamasyz etý úshin tıisti 1030 nysannyń tolyǵymen pasporttary daıyndalyp, búgingi kúnge 994 nysanda beıimdeý jumystary aıaqtalǵan.
Aıta ketý kerek, olardyń 240-y ǵana tolyqtaı beıimdelgen. Qalǵandary tek pandýs pen taqtaıshalar ornatýmen shektelgen.
Berdibek Saparbaev aýdandar men oblys ortalyǵynyń ákimderine múgedekterge qoǵamdyq oryndarda jáne mekemelerde tıisti deńgeıde jaǵdaı jasaý úshin jumystar júrgizýdi tapsyrdy.
Aıtalyq, áli kúnge aıaldamalar, trotýarlar, arnaıy baǵdarshamdar múmkindigi shekteýli azamattarǵa beıimdelmegen.
- Erekshe qajettilikteri bar adamdar óz týǵan qalasynda jaıly ómir súrýi úshin barlyq jaǵdaı jasalýy kerek. Biz qoljetimdi, kedergisiz orta qurýǵa tyrysýdamyz. Olar qalada erkin júrip-turyp, dúkenderge, teatrlarǵa jáne basqa da oıyn-saýyq oryndaryna baryp, qoǵamdyq kólikti qoldana alýy tıis. Alaıda, qarapaıym jaıaý júrginshiler jolaǵynan ótý múmkin bolmasa, basqalarǵa qalaı qol jetkizýge bolady? – dep eskertken oblys ákimi Taraz qalasynyń basshylyǵyna osy sekildi máselelerdi sheshýdi tapsyrdy.
Sonymen qatar, aımaq basshysy múmkindigi shekteýli jandardy mádenı jáne sporttyq sharalarǵa belsendi túrde tartý qajettigin basa aıtty.