Úsh aptanyń ishinde brakonerlerden 12 tonna balyq tárkilendi
Bul týraly feısbýk paraqshasynda QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet jazdy.
«Eldiń batys aımaǵynda áli de «Bekire-2019» aktsııasy júrip jatyr. Aktsııa bastalǵan jyl basynan beri tabıǵat qorǵaý zańnamasynyń buzylýyna qatysty 390 zańbuzýshylyq anyqtaldy. Ol kemshilikterdiń 277-si - Atyraý oblysynda, 78-i - Mańǵystaý oblysynda, 35-i - BQO-da tirkeldi», - dep jazady Sáken Dildahmet.
Habarlanyp otyrǵandaı, balyqty zańsyz aýlaýǵa qatysy bar 295 adam jaýapkershilikke tartylǵan. Aýyr zańbuzýshylyqqa jol bergeni úshin 18 is sotqa jóneltilgen.
«Aktsııa barysynda kemshilikke jol bergenderden 12 tonna 856 keli balyq tárkilendi (úsh aptanyń ishinde). Ol balyqtyń 667 kelisi - bekire balyǵy bolsa, 3,2 kelisi - bekireniń ýyldyryǵy. Sonymen birge, brakonerlerden balyq aýlaýǵa arnalǵan 175 qural, 33 júzý jáne kólik quraly tárkilengen», - delingen jazbada.
Ákimshilik isterdi qaraý nátıjesi boıynsha brakonerlerge 3,7 mln teńge aıyppul salynyp otyr. «Bekire-2019» balyq qorǵaý aktsııasy jalǵasýda.
