Úsh alyptyń shyǵarmalary dáriptelsin - Máýlen Áshimbaev

ASTANA. QazAqparat – Búgin qazaq ádebıetindegi úsh alyp tulǵa – Muhtar Áýezov, Sherhan Murtaza men Oralhan Bókeıdiń týǵan kúni. Osy oraıda, Parlament Senatynyń tóraǵasy Máýlen Áshimbaev áleýmettik jelidegi paraqshasynda jazba qaldyrdy, dep habarlaıdy QazAqparat.

«Búgin halqymyzdyń uly perzenti, zańǵar jazýshy, dańqty qalamger Muhtar Áýezovtiń týǵanyna 125 jyl tolyp otyr. Ádebıetimizdiń taǵy bir alyby, qaıratker tulǵa Sherhan Murtaza da kózi tiri bolsa, dál osy kúni 90 jasqa tolar edi. Sondaı-aq, búgin Sheraǵańdy ustaz tutyp, sońynan ergen sýretker, kóp oqyrmannyń súıikti jazýshysy Oralhan Bókeıdiń týǵan kúni. Sondyqtan, 28 qyrkúıek – qazaq ádebıetiniń kúni desek, artyq bola qoımas.

Jalpy, Áýezovti oqý arqyly biz Abaı aıtqan oıdyń tereńine boılaımyz. Sheraǵańnyń shyǵarmalary men oı-tolǵamdarynan ulttyq rýhtyń aıbarly úni estiledi. Al, Oralhannyń týyndylarynan qaz-qalpyndaǵy qazaqy bolmysty kóremiz. Sol sebepti, úsh alyptyń shyǵarmalaryn dáripteýge, ásirese óskeleń urpaq arasynda keńinen asıhattaýǵa basa mán bergen jón. Bul – ulttyq múdde turǵysynan da asa mańyzdy qadam.

Búgingideı ataýly kúnde tilegen duǵalarymyz qabyl bolsyn. Jazýshylarymyzdyń rýhtary shat bolyp, muralary máńgi jasaı bersin», - dep jazady Máýlen Áshimbaev.

Foto: facebook.com/m.ashimbayev