Úsh aǵaıyndyny atqan qarýdyń ıesi bostandyqta júr - týystary
TALDYQORǴAN. QazAqparat - Týystarynyń pikirinshe, byltyr qyrkúıek aıynda dúıim jurttyń jaǵasyn ustatqan úsh aǵaıyndynyń óliminiń áli de ashylmaǵan tustary bar. Bul týraly marqumnyń týysy Erkin Beısekeı QazAqparat tilshisine bergen suhbatynda málim etti.
Onyń sózinshe, marqumdardy atqan qarýdyń ıesi bostandyqta júr.
«Marqumdardy atqan qarý jáne tintý barysynda taǵy bir qarý paıda bolǵan. Osy qarýlardyń ıeleri bostandyqta júr. Osy is boıynsha joǵarǵy jaqtaǵylarǵa aıtarymyz, atalǵan qarý jóninde tergeý aıaǵyna jetken joq. Sebebine biz áli jete almaı otyrmyz», - deıdi Erkin Beısekeı.
Sondaı-aq ol quzyrly organ ókilderi sottalǵandardan moraldyq jáne materıaldyq shyǵyndy ýaqyt ozdyrmaı óndirip berse dep otyr. Sebebi, qaza bolǵan marqumdardyń artynda 8 bala jetim, jarlary jesir qaldy. Al, úsh aǵaıyndyny azaptap óltirdi dep sottalǵan Talǵat Súleımenov pen Murat Ońalbaevqa jalpy quny 105 mln teńge materıaldyq jáne moraldyq shyǵyndy óteý jóninde sot úkimi shyqqan bolatyn. Aıta ketý kerek, úsh aǵaıyndynyń qazasy týystary úshin óte aýyr boldy. Marqum Jarqynbek Doldannyń anasy ulynyń qazasyn kótere almaı, qaıtys boldy. Erteń jetisi ótedi.
Búgin Almaty oblystyq sotynda úsh aǵaıyndyny óltirgenderdiń appelıatsııalyq shaǵymy qaraldy. Sot alqasy shaǵymdy qanaǵattandyrýsyz qaldyrdy. Muqııat Zarylhan, Jarqynbek Doldan jáne Qadilbek Álimhandy óltirdi jáne qylmys boıynsha habarlamady degen aıyppen úsh adam sottalǵan bolatyn. Talǵat Súleımenov ómir boıyna temir torǵa qamaldy. Al Murat Ońalbaev 25 jylǵa, Baqyt Baıqasymov 4 jylǵa sottalǵan edi. Qarasaı aýdandyq sotynda qaralǵan qylmystyq istiń úkimi 29 qarashada shyqqan bolatyn.
