Úsh adamnyń ólimine kúdikti 26 jastaǵy júrgizýshi qamaýǵa alyndy
TALDYQORǴAN. QazAqparat - Almaty oblysynda úsh adam qaza tapqan kólik apatyn jasady degen kúdikpen 26 jastaǵy júrgizýshi qamaýǵa alyndy, dep habarlaıdy QazAqparat tilshisi.
Jol-kólik oqıǵasy Panfılov aýdanynda bolǵan. 25 naýryz kúni Úsharal aýylynyń mańynda «Aýdı-100» jáne «Toıota-Kamrı» avtokólikteri soqtyǵysqan. Saldarynan úsh adam qaza taýyp, taǵy úsh adam túrli dene jaraqattarymen Panfılov aýdanynyń aýrýhanasyna jetkizildi.
«Aldyn ala boljam boıynsha, kólik apaty 26 jastaǵy «Aýdı-100» kóligi júrgizýshisiniń kinásynan bolǵan. Ol da dene jaraqatymen aýrýhanaǵa tústi. Keshe kúdikti aýrýhanadan shyǵarylǵan soń, ony qamaqqa alý týraly sheshim qabyldandy. Fakti boıynsha qajetti saraptamalar taǵaıyndalyp, qylmystyq tergeý jalǵasýda. Іs oblystyq Anyqtaý basqarmasynyń óndirisinde jáne departament basshylyǵynyń qatań baqylaýyna alynǵan»,- dep málim etti Almaty oblysy Polıtsııa departamentiniń baspasóz qyzmetinen.
Sonymen qatar, kólik oqıǵasy kezinde kúdikti mas kúıinde bolǵany habarlandy. Onyń mashınasy tárkilenip, arnaıy avtoturaqqa jetkizildi.
Polıtseıler jasaǵan taldaýǵa sáıkes, óńirde jyl basynan beri jol apattarynyń sany 36,2% artqan. Іshimdik ishken kúıde kólik tizgindegen 500 júrgizýshi jaýapkershilikke tartyldy. Júrgizýshiler jol beretin buzýshylyqtar - jyldamdyq rejimin saqtamaý, joldyń qarsy baǵytyna shyǵyp ketý.
«Oblysta jol qaýipsizdigi boıynsha ártúrli is-sharalar únemi ótip turady. Soǵan qaramastan, júrgizýshilerdiń jol júrý erejesin saqtaý tártibi áli kúnge túzelmeı otyr. Tek ótken bir apta ishinde oblys joldarynda 17 kólik apaty oryn alyp, 12 adam qaza tapty»,- dep atap ótti baspasóz qyzmetinen.
Óz kezeginde polıtseıler temir tulpar ıelerin jolda abaı bolýǵa, zań talaptaryn buzbaýǵa jáne jol júrý erejelerin qatań saqtaýǵa shaqyrady.
