Úsh adamdy atyp óltirdi dep aıyptalǵan Mańǵystaý turǵyny eki aıǵa qamaldy

ATYRAÝ. QazAqparat - Atyraýda qalalyq sot úsh adamdy óltirdi dep aıyptalǵan kúdiktini eki aıǵa qamaý jóninde sheshim shyǵardy, dep habarlaıdy QazAqparat.

Oblystyq sottyń baspasóz qyzmeti taratqan málimetke qaraǵanda úsh adamdy óltirip, bireýin jaralady dep kúdikke ilingen Mańǵystaý oblysynyń 28 jastaǵy turǵyny sot sanktsııasymen eki aıǵa qamalǵan.

Aımaqtyń densaýlyq saqtaý basqarmasy oq tıip, es-tússiz jansaqtaý bólimine túsken jaraly jigittiń jaǵdaıy ortasha aýyr ekenin jetkizdi. Dárigerler naýqasty neırotravmatologııa bólimine aýystyrǵan. Qazir zardap shekken jigit sóıleı alady.

Eske sala keteıik, osyǵan deıin Atyraýda atystan úsh adam mert bolyp, bireýi aýrýhanaǵa túskenin jazǵan bolatynbyz.

Atys 15 naýryz saǵat 22:10 shamasynda bolǵan. Atyraý qalasynyń «Avangard-3» shaǵyn aýdanyndaǵy aıaldamada tapanshadan atylǵan oqtan 27 jáne 23 jastaǵy eki jigit qaza tapqan.

Al, 1995 jylǵy er adam aýrýhanaǵa jetkizilgen.

Jedel-tergeý toby oqıǵa ornynda tergeý júrgizý kezinde taǵy bir adamnyń múrdesin tapqan. Tekserý kezinde onyń 27 jastaǵy er adam ekeni anyqtalǵan.

Kúdikti oqıǵa ornynan boı tasalap qashyp ketken.

Keıin polıtsııa qyzmetkerleri atalǵan qylmysqa kúdikti retinde Mańǵystaý oblysynyń 1993 jylǵy týmasyn ýaqytsha ustaý ızolıatoryna qamaýǵa aldy.

Qazir kúdiktige qatysty QR Qylmystyq kodeksiniń 99-babynyń 2-bóligimen tergeý amaldary júrgizilip jatyr.

Polıtsııa keıinirek onyń eki tapanshasyn tapty.