Úsh adamdy óltirip, 24 jyl boıy qashyp júrgen Reseı azamaty Aqtóbeden tabyldy

Aqtóbe polıtseıleri reseılik quqyq qorǵaý organdarynan 24 jyl boıy jasyrynǵan qylmyskerdi ustady, dep habarlaıdy QazAqparat polıtsııaǵa silteme jasap. 

Krımınaldyq polıtsııa basqarmasynyń qyzmetkerleri úsh adamdy óltirgeni jáne qaraqshylyq shabýyl jasaǵany úshin óz elinde izdeýde júrgen Reseı Federatsııasynyń 56 jastaǵy azamatyn ustady.

Ol 1999 jyldyń kúzinde Orynbor qalasynda adamdar tobymen (buryn sottalǵan jáne ustalǵan 3 adammen) aldyn ala sóz baılasyp, qarjylaı paıda tabý maqsatynda 3 azamatqa qaraqshylyq shabýyl jasap óltirgen jáne qylmys izin jasyrý úshin olardyń máıitin órtep, kómip tastaǵan.

Qazirgi ýaqytta ustalǵan adam tergeý ızolıatoryna qamaldy.

Ony Reseı Federatsııasyna ekstradıtsııalaý máselesi sheshilip jatyr.