Úsh adam janyp ketti: Avtogaz quıý beketiniń ıesi sotta jaýap berip jatyr
AQTÓBE. KAZINFORM - Sottalýshyǵa Qylmystyq kodekstiń «Jarylys qaýpi bar obektilerde qaýipsizdik qaǵıdalaryn buzý» baby boıynsha aıyp taǵyldy. Basty sot talqylaýy kezinde jábirlenýshi keshirim berdi.
Aqtóbe qalalyq №2 sotynda oblys ortalyǵyndaǵy gaz quıý beketiniń ıesine qatysty sot otyrysy bastaldy. Oǵan Qylmystyq kodekstiń 281-baby 3-bóligimen aıyp taǵyldy. Bıyl 19-maýsym kúni kólik órtenip, onyń ishinde bolǵan eki kishkentaı qyz ben onyń anasy tirileı janyp ketti.
Sodan soń Qylmystyq is qozǵalyp, ıesi qamaýǵa alyndy.
Basty sot talqylaýynda polıtsııa oqıǵanyń qalaı bolǵanyn jáne saraptama qorytyndylaryn jarııalady.
Іs materıalyna súıensek, avtogaz quıý beketinde jumys isteıtin operator densaýlyǵy syr bergenin aıtyp, kúni buryn eskertedi. Avtogaz quıý beketiniń ıesi kezekshilikte júrgen ózge operatordy shaqyryp, ýaqytsha jumysshy tabýdy suraıdy. Ótinishten soń ol áleýmettik jelidegi «Aqtóbe jumys ortalyǵy» chatyna habarlandyrý beredi. Ony kórgen 20 jastaǵy jigit habarlasyp, bir táýlikke operator bolýǵa kelisedi. Bul jumysty ózi emes, inisine tapsyrady. Qyzmet aqysyna 15 myń teńge esepteledi.
- Avtogaz beketiniń ıesi olardyń daıarlyqtan ótkenin rastaıtyn qujattarynyń bar-joǵyn teksermeı, órt jáne jarylys qaýipsizdigi talaptary boıynsha tıisti nusqama da ótkizbeı, arnaıy kıimmen jáne qajetti jeke qorǵaný quraldarymen qamtamasyz etpeı operator retinde jumysqa jibergen. 19-shilde kúni saǵat 22:50 shamasynda gaz quıý stansasynyń №4 gaz quıý kolonkasyna 54 jastaǵy er adam kóligimen kelip toqtaıdy. Іshinde 46 jastaǵy inisi, onyń 44 jastaǵy áıeli jáne 10 jáne 6 jastaǵy qyzdary bolady. Olar avtokóliktiń júksalǵyshyndaǵy turmystyq gaz ballonyn kórsetip, suıytylǵan munaı gazyn toltyrýdy suraǵan. Avtogaz quıý stansalarynda turmystyq gaz ballondy toltyrýǵa zańmen tyıym salynǵanyna qaramastan arnaıy ótpeli tetikti alyp, toltyrýǵa kiristi. Nátıjesinde turmystyq gaz ballonyn toltyrý kezinde gaz-aýa qospasanyń tutanýynan órt jáne jarylys boldy. Kólik órtendi. Kólik quny - 2 000 900 teńge. Kólik ishinde bolǵan úsh adam qaza boldy,- dedi prokýror Sáken Bertileýov.
Saraptama qorytyndysyna sáıkes, órt ótpeli tetikten gaz quıý pıstoletin sheship alý kezinde paıda bolǵan mehanıkalyq ushqynnan tutanǵan. Úsh adam tirileı janyp ketse, rýlde otyrǵan júrgizýshiniń denesin 40-45 paıyzǵa kúıik shaldy. Onyń tynys alý joldary da zaqymdanyp, áli kúnge deıin em alyp júr.
Jábirlenýshi sol kúni otbasymen birge Sazdy aýylynan qalaǵa azyq-túlik, dári-dármek alýǵa kelgen. Orta jolda kondıterlik dúkenge soqpaq bolyp, gaz quıý beketine de aıaldaıdy. Operator turmystyq gaz ballonyn toltyrý qyzmeti 3 500 teńge ekenin aıtyp, kelisim bergen. Sol arada jábirlenýshi dalaǵa shyǵyp, qarap turady. Al áıeli men eki qyzy dárethanaǵa baryp, qaıta kólikke otyrady. Arada birer mınýt ótkende 30 lıtrlik ballonǵa 37 lıtr gaz quıylyp, dabyl qaǵady. Gaz toltyrý qyzmeti avtomatty túrde ajyraıdy dep kútkenimen elektrondy kórsetkishtegi san 42-ge jetip, kassaǵa qaraı júgiredi.
- Qas-qaǵym sátte órt shyqty. Aǵam «ishte adam bar» dep aıtty. Ne isterimdi bilmeı qaldym. Órt sóndirý ballonyn qolyma ustaǵanda shlang joq, ishi de bos tur. Sol jerde aıqaıladym. Ári qaraı esimdi bilmeımin,- dedi sotta jábirlenýshi.
Aıta keteıik, jábirlenýshi men onyń marqum áıeli bes bala tárbıelegen. Eki qyzynan bólek, úsh uly bar. Sot otyrysynda sottalýshynyń qorǵaýshylary jábirlenýshilermen arada medıatsııalyq kelisim júrgenin aıtty. Jábirlenýshiler de keshirim berdi. Sot otyrysy jalǵasyp jatyr.
Aqtóbede gaz quıý beketterinde budan ózge de jarylys boldy. Joıqyn jarylysty jaqyn turǵan úı turǵyndary sezingenimen, eshkim zardap shekpedi.
