Úsh adam janyp ketti: Aqtóbede avtogaz quıý beketiniń ıesi sottaldy
AQTÓBE. KAZINFORM — Sot kásipkerdi 4 jylǵa bas bostandyǵynan aıyrý jazasyn taǵaıyndady. Sottalýshy jazasyn qylmystyq atqarý júıesiniń qaýipsizdigi barynsha tómen mekemesinde óteıdi.
Aqtóbe qalalyq № 2 sotynda avtogaz quıý beketiniń basshysyna qatysty istiń úkimi oqyldy. Oǵan Qylmystyq kodekstiń 281-baby 3-bóligimen aıyp taǵyldy.
— Sottalýshy Qylmystyq kodekstiń 281-baby 3-bóligimen kináli dep tanylsyn. Oǵan 3 jylǵa jarylys qaýpi bar obektilerde basshylyq laýazymdy atqarý, 4 jyl merzimge bas bostandyǵynan aıyrý jazasy taǵaıyndalsyn. Jaza óteý orny — qylmystyq atqarý júıesiniń qaýipsizdigi barynsha tómen mekemesi, — dedi sýdıa Edil Qudaıbergen.
Keıin sýdıa úkimdi túsindirip berdi. Ol sottalýshyǵa kináni ishinara moıyndaǵanyn aıtty.
— Avtogaz quıý stansasyn is júzinde ózińiz basqarǵansyz. Sol kezde tıisti qujatty rásimdemeı, nusqaýlyq júrgizbeı kýáni jumysqa qabyldaǵansyz. Sol kýá jumys istegen ýaqytta kólik quraly ishindegi adamdardy túsirmeı, gaz quıýǵa jibergen. Ári qaraı zańda tyıym salynǵan talaptar saqtalmaı, turmystyq gaz ballonǵa suıytylǵan gaz quıǵan. Saldarynan gaz qysymmen keıin qaraı shyǵyp, aýamen aralasyp, órt, jarylys bolǵan. Úsh adam qaza tapty. Sol jerde bolǵan jábirlenýshini kúıik shaldy. Kináńizdi ishinara moıyndaısyz. ıAǵnı, taǵylǵan aıypty tolyqtaı moıyndamaısyz. Іstegi ýájdemelerdi daýlap, osy oqıǵaǵa jábirlenýshiniń de kinási bar dep keltirip otyrsyz. Sot shyn nıetpen ókiný joq dep esepteıdi. Jaza ádiletti bolýy kerek. Áleýmettik ádiletti qalpyna keltirý maqsatynda sottalǵan adamnyń túzelýine, sondaı-aq basqa da adamdardyń aldaǵy ýaqytta qylmys jasaýynyń aldyn alý maqsatynda osyndaı jaza taǵaıyndalady, — dedi sýdıa.
Sottalýshy jaryssóz kezinde jeńil jaza berýshi surady jáne ózi týraly málimet berdi.
— Qazir jasym 57-de. Sonyń 40 jyldan astam ýaqytyn adal eńbekke arnadym. 23 jyl memlekettik, 13 jyl basshylyq qyzmet atqardym. Qyzmette marapattaldym. Sońǵy 9 jylda belsendi túrde kásipkerlik qyzmetti júzege asyryp kelemin. Otbasylymyn, kámeletke tolmaǵan, stýdent balam bar, - dedi sottalýshy.
Eske salsaq, oqıǵa bıyl jazda boldy. Gaz quıý beketinde kólik jarylyp, eki bala men onyń anasy janyp ketti. Osy oqıǵadan soń gaz beketiniń ıesi qamaýǵa alynyp, aıyp taǵyldy. Basty sot talqylaýy kezinde jábirlenýshi keshirim berdi.
