Úsh adam qaryzy bar aýyldasynyń ıtin soıyp jegen
PETROPAVL. QazAqparat – Soltústik Qazaqstan oblysynda ıtti óltirip, keıin soıyp jegen úsh turǵynǵa qatysty qylmystyq is qozǵaldy, dep habarlaıdy QazAqparat.
SQO Polıtsııa departamenti baspasóz qyzmetiniń málimetinshe, 22 tamyzda kúni Bolshaıa Malyshka eldimekeniniń turǵyny polıtsııaǵa aryzdandy. Aıtýynsha, úsh aýyldasy onyń ıtin jep qoıǵan. Ol úsheýdiń bireýine 6 myń teńge qaryz bolǵan. Sonyń óteýi retinde ıtin bergen. Alaıda aýyldastary ol ıtti úı kúzetý úshin emes, jeý úshin alǵan eken.
Úsh er adam ıtti Esil ózeniniń jaǵasynda uryp óltirip, soıyp, otqa qaqtap jegen. Ittiń daýysy men ony uryp jatqanyn jaqyn mańda balyq aýlap otyrǵan 12 men 16 jastaǵy eki jasóspirim estıdi. Keıin úıine ketip bara jatqan balalardyń biri úsh aýyldasynyń sary ıtti aǵashqa asyp qoıyp, soıyp jatqanyn kórgen.
Aýdandyq polıtsııa bóliminiń qyzmetkerleri 33 jastaǵy kúdiktini ustady. Onyń qasynda bolǵan 34 jáne 38 jastaǵy eki sybaılasynan jaýap alyndy. Atalǵan fakti Sotqa deıingi tergep-tekserýdiń biryńǵaı tizilimine «Janýarlarǵa qatygezdik jasaý» baby boıynsha tirkeldi..
«Oqıǵaǵa qatysy barlardyń biri ıttiń etin jeýden bas tartqan. Alaıda úsheýi de óz áreketterin oǵash eshteńe baıqamaıdy. Sot olardyń pikirin ózgertedi degen senimdemiz. Janýarlarǵa qatygezdik kórsetkenderge zań boıynsha 120 AEK mólsherinde aıyppul nemese sol mólsherde túzeý jumystaryna, ne 120 saǵatqa deıingi merzimge qoǵamdyq jumysqa tartý, ne bolmasa 30 táýlikke deıingi merzimge qamaý jazasy qarastyrylǵan», - dedi Qyzyljar aýdany PB bastyǵy Álıhan Baıqadamov.
