Ýsama ben Ladenniń uly Frantsııadan deportatsııalandy
PARIJ. KAZINFORM – Frantsııa úkimeti «Ál-Qaıda» halyqaralyq lańkestik uıymynyń burynǵy jetekshisi Ýsama ben Ladenniń uly Omarǵa elge kirýge resmı túrde tyıym saldy. Bul týraly Frantsııanyń ishki ister mınıstri Brıýno Retaıo X-tegi paraqshasynda habarlady.
Mınıstrdiń aıtýynsha, Omar ben Laden birneshe jyldan beri Frantsııanyń soltústigindegi Orn departamentinde áıelimen (brıtan azamaty) birge turǵan. Alaıda frantsýz úkimeti byltyr áleýmettik jelide terrorızmdi nasıhattaıtyn pikirlerin jarııalaǵan soń ony respýblıkadan shyǵarý týraly sheshim qabyldaýdy talap etken. Sot bul ótinishti zańdy dep tapqannan keıin úkimet Omardyń Frantsııadan ketýin qamtamasyz etti.
– Omar ben Ladenniń Frantsııaǵa kirýine ákimshilik tyıym salý týraly sheshimniń arqasynda ol qandaı da bir sebeptermen elge orala almaıdy, – dedi Retaıo.
Aqparat úshin, Ýsama ben Laden 2001 jyly 11 qyrkúıekte Nıý-Iorktegi qos munaralar jarylǵan lańkestik áreketti óz moınyna alǵan «Ál-Kaıda» halyqaralyq lańkestik uıymynyń negizin qalaýshy jáne burynǵy jetekshisi.
"Frantsýzdyq «Parisen» gazeti Omar ben Ladenniń qazir Katarda ekenin, ol elden shyǵarý týraly sheshimge qarsy apellıatsııalyq shaǵym túsirgenin, biraq juma kúni frantsýz soty ony qabyldamaǵanyn habarlady" dep jazady Euronews.
Omar ben Laden taǵylǵan aıyptardy joqqa shyǵardy.
Jergilikti Le Publicateur Libre gazetiniń habarlaýynsha, daýly tvıtterdegi postty ben Laden 2023 jyly 2 mamyrda, ákesiniń týǵan kúninde jarııalaǵan.
Omar onyń atynan beıtanys adam jazǵanyn alǵa tartty.
– Basqa elden bóten bireýler meniń atymdy paıdalanyp Twitter akkaýntymnyń qupııa parolin buza alǵan. Bul meniń sózderim emes. Men bul týraly Twitter-ge habarladym jáne bir aptadan keıin akkaýnt toqtatyldy. Men terrorızm men zorlyq-zombylyqty shyn júrekten qaralaıtynymdy adamdarǵa aıtqym keledi, – dedi ol jýrnalısterge.
AQSh úkimetiniń resmı nusqasy boıynsha, ben Laden 2011 jyly 2 mamyrda Pákistannyń soltústik-batysyndaǵy Abbotabad qalasyndaǵy vıllada arnaıy operatsııa kezinde kózi joıylǵan.
Bul aqparatty «Ál-Qaıda» da rastaǵan.
