Ýsama ben Ladenniń kómekshisi qalǵan ómirin túrmede ótkizý jazasyna kesildi
ASTANA. Qyrkúıektiń 1-i. QazAqparat - Ýsama ben Ladenniń burynǵy kómekshileriniń biri - Mamdýh Mahmýd Salım túrme kúzetshileriniń birin óltirmek bolǵany úshin qalǵan ómirin túrmede ótkizý jazasyna kesildi,
dep habarlaıdy «RIA «Novostı» agenttigi batys basylymdaryna silteme jasap.
2000 jyly Nıý-Iorkte Manhettendegi túzetý mekemesiniń kúzetshisi Lýıs Pepeniń ómirine qastandyq jasalǵan kezde, Salım AQSh azamattaryna qarsy lańkestik áreketter josparlady jáne daıyndady degen aıyptarmen sot úkimin kútip jatqan edi. Ben Ladenniń kómekshisi kúzetshige taraq ala júgirip, onyń bir kózin aǵyzyp jibergen edi. Osy qastandyqtyń saldarynan kúzetshi mıynan da jaraqat alǵan bolatyn.
AQSh prokýratýrasynyń paıymdaýynsha, «Ál-Kaıedanyń» negizin qalaýshylardyń biri bolǵan, keıinnen jattyǵý lagerlerin qadaǵalaǵan jáne Pákistan men Aýǵanstanda lańkesterdiń panalaryn uıymdastyrýmen aınalysqan 52 jastaǵy Salım 2002 jyly federaldyq kúzettiń ókilin óltirý maqsatynda onyń ómirine qastandyq jasaǵanyn moıyndady.
2004 jyly sot Salımdi 32 jylǵa kesken bolatyn, biraq appelıatsııalyq sot isti qaıta qaraýǵa ókim etti, sebebi sýdıa aıyptalýshynyń lańkestik áreketterge, onyń ishinde 1998 jyly Kenııa men Tanzanııadaǵy AQSh elshilikterine shabýyldar josparlaýǵa jáne olardy júzege asyrýǵa qatysyn eskermegen.
