Usaq tsehtar Ózbekstanǵa et eksportyn arttyrdy — AShM nege shekteý bar ekenin túsindirdi
ASTANA. KAZINFORM — Aýyl sharýashylyǵy mınıstri Aıdarbek Saparov Májilis depýtatynyń saýalyna joldaǵan jaýapta sıyr etiniń eksportyna kvota engizý ne úshin kerek ekenin túsindirdi.
— Qazaqstan Respýblıkasynyń aýmaǵynan úshinshi elderge jáne Eýrazııalyq ekonomıkalyq odaq elderine 13 (on úsh) myń tonna kóleminde áketýge sandyq shekteýler (kvotalar) engizý maquldandy. 2025 jylǵy 3 jeltoqsannan bastap 2025 jylǵy 31 jeltoqsanǵa deıin iri qara mal etin áketýge sandyq shekteýler (kvotalar) engizý týraly buıryq qabyldandy. Buıryq 2025 jylǵy 3 jeltoqsanda kúshine endi. Buıryqty qabyldaýdaǵy maqsat eldiń azyq-túlik qaýipsizdigin qamtamasyz etý, mal sharýashylyǵy ónimderin óńdeýdi damytý, ishki naryqta etke tapshylyqty boldyrmaý, sondaı-aq sıyr etine baǵany turaqtandyrý úshin qabyldandy. Engizilgen tásil olıgopolııany qalyptastyrýǵa nemese básekelestikti shekteýge baǵyttalmaǵanyn atap ótken jón, — dep jazylǵan jaýapta.
Onyń sózinshe, bul kvota sıyr etin óndirýdiń órkenıetti, ashyq jáne jaýapty júıesin qurýǵa kómektesedi.
— Bul tásil usaq mal soıý tsehtarynyń maldy kórshi elderge qaıta satý múmkindigin joqqa shyǵarady (mal satyp alǵan kompanııalar jumys istedi, sodan keıin bordaqylaýsyz, etti Ózbekstanǵa eksporttady). Mundaı tájirıbe burmalanýǵa ákelip soqtyrdy jáne sıyr etiniń ishki baǵasynyń ósý faktorlarynyń birine aınaldy. Osylaısha, kvotalaýdy engizý mal ósirýmen jáne bordaqylaýmen aınalyspaıtyn, tek janýarlardy qaıta satatyn eksporttaýshy deldaldardy joıýǵa baǵyttalǵan. Olardyń qyzmeti sıyr etiniń negizsiz qymbattaýyna ákeledi jáne salanyń damýyna yqpal etpeıdi, — deıdi mınıstr.
Jaýapta qabyldanǵan shara Eýrazııalyq ekonomıkalyq odaq týraly sharttyń 29 jáne 47-baptaryna sáıkes keletini, Qazaqstannyń halyqaralyq mindettemelerine qaıshy kelmeıtini aıtylǵan.
Eske salsaq, depýtat Temir Qyryqbaev Básekelestikti qorǵaý jáne damytý agenttiginiń tóraǵasy Marat Omarov pen Aýyl sharýashylyǵy mınıstri Aıdarbek Saparovtan et eksportyna salynǵan tyıymdy joıýdy suraǵan.