Usaq maldan anyqtalǵan kúl aýrýyna baılanysty ShQO-daǵy eki aýylda karantın jarııalandy

ASTANA. QazAqparat – Usaq maldan anyqtalǵan qoı kúli aýrýyna baılanysty Shyǵys Qazaqstan oblysynyń Katonqaraǵaı aýdanyna qarasty 2 aýylda karantın jarııalandy. Bul týraly «Ashyq» NQA portalynda jarııalanǵan eldimeken ákiminiń sheshim qujatynda jazylǵan, dep habarlaıdy QazAqparat tilshisi.

«Katonqaraǵaı aýdandyq aýmaqtyq ınspektsııasy basshysynyń 2023 jylǵy 7 naýryzdaǵy usynysyna sáıkes, Shyǵys Qazaqstan oblysy Katonqaraǵaı aýdany Katonqaraǵaı aýyldyq okrýginiń Shyńǵystaı, Jańa Úlgi aýyldarynda múıizdi usaq mal arasynda qoı kúli (ospa) aýrýynyń paıda bolýyna baılanysty karantın belgilensin», - delingen Katonqaraǵaı aýyldyq okrýginiń ákimi Qaırat Nurqanov shyǵarǵan sheshimde.

Qosa ketsek, buǵan deıin Qaraǵandy oblysyndaǵy aýylda iri qaradan qarasan anyqtalyp, karantın jarııalanǵan edi.