Usaq buzaqylyq úshin jaza kúsheıtiledi

ASTANA. KAZINFORM – 2025 jyldyń 1 qyrkúıeginen usaq buzaqylyq úshin jaza kúsheıtiledi. Bul týraly Senat depýttarynyń saýalyna Premer-mınıstr Oljas Bektenovtiń jaýabynda aıtylǵan.

- 2025 jylǵy 10 qańtarda «Ákimshilik quqyq buzýshylyq týraly kodekske ózgerister men tolyqtyrýlar engizý týraly» zań (budan ári – ÁQBtK) qabyldandy. ÁQBtK qoǵamdyq jumystar ınstıtýtyn engizetin 49-1, 49-2 jáne 914-1- baptarmen tolyqtyryldy. Atalǵan normalar 2025 jylǵy 1 qyrkúıekten bastap kúshine enedi, - dedi Úkimet basshysy.

Sonymen qatar, ol usaq buzaqylyq úshin sanktsııalar (ÁQBtK-niń 434-baby) kúsheıtilgenin atap ótedi. Naqty atqanda, atalǵan baptyń:

– 1-bóligi boıynsha: 20 AEK (1 AEK 3 932 teńge) mólsherinde aıyppul ne 5-ten 15 táýlikke deıingi merzimge qamaýǵa alý, sondaı-aq 20-dan 60 saǵatqa deıingi mindetti qoǵamdyq jumystar kózdelgen;

– 2-bóligi boıynsha: 15-ten 30 táýlikke deıin qamaýǵa alý jáne 60-tan 100 saǵatqa deıin qoǵamdyq jumystar sanktsııasy engizildi.

- Osylaısha, buzaqylyq áreketter úshin jazany qatańdatý máselesi múddeli memlekettik organdar tarapynan ýaqtyly qaralyp, tıisti sharalar qabyldanyp jatqanyn jetkizemiz, - dedi Oljas Bektenov.

Esterińizge sala ketsek, senator Gennadıı Shıpovskıh elimizde buzaqylyq áreketter — mektepterdegi agressıvti minez-qulyqtan bastap, kóshedegi tóbelester kóbeıip bara jatqanyna alańdaýshylyq tanytyp, Úkimet basshysynyń atyna depýtattyq saýal joldaǵan edi.