USAID-tiń jabylýy Qazaqstandaǵy jobalarǵa qalaı áser etip jatyr
ASTANA. KAZINFORM – Saýda jáne ıntegratsııa vıtse-mınıstri Qaırat Tórebaev Májilis kýlýarynda AQSh Halyqaralyq damý agenttiginiń jumysyn toqtatýy Qazaqstanda bastalyp ketken jobalarǵa qalaı áser etip jatqany týraly pikir bildirdi.
AQSh agenttiginiń Qazaqstanǵa qandaı qatysy bar
Resmı málimetke súıensek, 1992 jyldan beri agenttik Qazaqstanǵa 500 mln dollarǵa jýyq qarjy baǵyttaǵan.
Uıym memlekettik jáne táýelsiz uıymdardy qoldaý arqyly energetıka naryǵyn, jergilikti saýdany, iskerlik ortany damytýǵa kúsh saldy. Bul aqsha el ekonomıkasynyń túrli salalaryn, densaýlyq saqtaý júıesin, demokratııalyq ınstıtýttardy qoldaýǵa jumsalǵan. Ásirese ana men bala ólimin azaıtý, AITV/JITS dertimen kúres, qorshaǵan ortany qorǵaý baǵytynda kóptegen jobany qarjylandyrdy. Onyń ishinde Araldaǵy ekologııalyq apattyń saldaryn jeńildetýge baǵyttalǵan jobalar da bar.
Saýda mınıstrliginiń málimeti
- Ázirge Saýda jáne ıntegratsııa mınıstrliginiń qatysy bar jobalar toqtap qaldy deıtindeı málimet joq. Bir baǵdarlama bolǵan, ol byltyr aıaqtalǵan. Bıyl USAID bizdiń mınıstrlik arqyly eshqandaı jobany qolǵa alǵan joq, - dedi Qaırat Tórebaev.
Al Májilis depýtaty Magerram Magerramov elimizge sheteldik demeýshiler bóletin qarjyǵa aýdıt júrgizip, barlyq esep-qısabyn halyqqa jarııalaý kerek dep otyr.