USAID Ortalyq Azııada AQTQ men týberkýlezdiń aldyn alýǵa baǵyttalǵan jańa baǵdarlamalarymen tanystyrdy
ALMATY. Sáýirdiń 15-i. QazAqparat / Ádilet Musahaev / - Ortalyq Azııa halyqtary arasynda AQTQ men týberkýlez sııaqty taralý qaýpi tónip turǵan derttiń aldyn alý jónindegi baǵdarlama resmı túrde bastaldy.
Bul jaıynda búgin Almatyda ótken arnaıy baspasóz máslıhatynda aıtyldy, dep habarlaıdy QazAqparat.
«AQSh-tyń Halyqaralyq damý jónindegi agenttigi (|USAID) tarapynan qarjylandyrylatyn jobanyń bastalǵany jaıly málim etem. Jalpy quny 15 mıllıon AQSh dollary bolatyn bes jyldyq baǵdarlama AQTQ men týberkýlez syrqatyn juqtyryp alý qaýpi tónip turǵan ortaǵa arnalǵan», deıdi AQSh-tyń Qazaqstan Respýblıkasyndaǵy ýaqytsha ókili Pamela Spratlen.
Onyń aıtýynsha, bul dertke jeńil júristi áıelder, esirtki paıdalanýshylar, sottalǵandar men mıgranttar kóptep shaldyǵady. «Degenimen, ol adamdar qoǵamymyzdyń bir bóligi bolyp sanalǵandyqtan AQTQ men týberkýlezdiń aldyn alý sharalaryn jasaýymyz kerek», deıdi P.Spratlen.
«Aýtrıch densaýlyq qorǵany» baǵdarlamasy aıasynda óńirlik baǵdarlaýshy komıteti qurylyp, ol atalǵan aýmaqtarda baǵdarlamanyń qyzmetin úılestirý, zertteý júrgizý jáne onyń nátıjelerin baǵalaý máselelerine járdemdespek.
«Aýtrıch densaýlyq qorǵany» baǵdarlamasy AQSh-tyń Halyqaralyq damý jónindegi agenttiginiń kóptegen jobalarynyń biri bolyp tabylady. Baǵdarlamany seriktestikter konsortsıýmy júzege asyrady, onyń quramyna «PSI», «HOÝP», «Shyǵys-Batys» qory jáne «QR-ǵy AQTQ syrqatyna shaldyqqan adamdardyń qazaqstandyq odaǵy» qoǵamdyq qory kiredi.
2008 jyly Qazaqstanda 2500-den astam adam týberkýlez dertinen qaıtys bolǵan, 14 myńnan astamy jańadan syrqatqa shaldyqqan. Mundaı jaǵdaı Ortalyq Azııanyń basqa elderinde de saqtalyp otyr. Sondaı-aq jıyn barysynda AQTQ syrqatymen aýyratyndardyń týberkýlezge shaldyǵý faktory aıryqsha mańyz alyp otyrǵandyǵy aıtyldy.
