USAID Qazaqstandaǵy AQTV-men kúres boıynsha jańa baǵdarlama aıasynda 8 mln dollar baǵyttamaq (FOTO)
ALMATY. QazAqparat - USAID Ortalyq Azııadaǵy AQTV tralýymen kúres boıynsha jańa baǵdarlama qabyldady. «Kóshbasy» jobasy aıasynda Qazaqstandaǵy aýrýdyń taralýymen kúreske 5 jyl ishinde 8 mln dollar baǵyttalmaq. Atalǵan baǵdarlama Qyrǵyz Respýblıkasy, Tájikstan, Ózbekstan elderinde de júrgiziledi. Jobanyń jalpy quny 37 mln AQSh dollary bolyp otyr. Ár elge atalǵan somanyń 20 paıyzy bólinedi.
Aıta ketý kerek, qazirgi tańda Qazaqstanda AQTV juqtyrǵan 17 myń 700 adam tirkeýde tur.
«Óńirlik Joba ıÝNEIDS «90:90:90» strategııasyna sáıkes júzege asyrylady. 2020 jylǵa qaraı adamdardyń 90%-y ózderiniń AQTV mártebesin biletin bolady, AQTB dertin juqtyrǵany týraly dıagnoz qoıylǵan barlyq adamdardyń 90%-y antıretrovırýstyq terapııamen turaqty túrde qamtylady, al antıretrovırýstyq terapııamen qamtylǵan adamdardyń 90%-y vırýstyq júktemeni kemitý boıynsha baqylaýǵa alynady. Baǵdarlama AQTV jáne JQTB dertimen ómir keship júrgen adamdardyń ómirin saqtap qalýǵa baǵyttalǵan. Biz antıretrovırýstyq terapııa qabyldap, emdelýdi qajet etip otyrǵan adamdardy emdeý arqyly kúresetin bolamyz. Adamdar em-dom alyp jatqan kezde indettiń basqa adamdarǵa taralýy aıtarlyqtaı sıreı túsedi», - dedi Ortalyq Azııadaǵy USAID Mıssııasynyń Óńirlik dırektory Djorj Deıkýn.
Onyń aıtýynsha, Qazaqstan Respýblıkasynyń Úkimeti men Amerıka Qurama Shtattarynyń Úkimeti arasynda yntymaqtastyqqa qatysty Memorandýmǵa qol qoıylǵan. Atalǵan shara Qazaqstan Respýblıkasy men Amerıka Qurama Shtattary arasyndaǵy uzaq merzimge arnalǵan yntymaqtastyq sheńberinde ótkizilip otyr. Bıyl ınnovatsııalar jáne dıplomatııalyq qatynastar salasyndaǵy yntymaqtastyqtyń ornaǵanyna 25 jyl tolady.
