USAID Qazaqstanda mıgranttardyń quqyǵyn qorǵaý naýqanyn ótkizedi

NUR-SULTAN. QazAqparat – 18 jeltoqsan Halyqaralyq mıgrant kúni bolyp belgilengen, bul mańyzdy kúndi atap ótý úshin AQSh úkimeti Halyqaralyq damý agenttiginiń (USAID) Ortalyq Azııadaǵy qaýipsiz kóshi-qon jobasy arqyly Qazaqstandaǵy mıgranttardyń quqyǵy týraly aqparatty nasıhattaıtyn onlaın naýqan bastady, dep habarlaıdy QazAqparat tilshisi.

Mıgratsııa – adamnyń laıyqty, qaýipsiz jáne beıbit ómirge umtylysyna negizdelgen jahandyq protsess. Otannan ketý – kóp jaǵdaıda májbúrli sheshim bolyp sanalady jáne qaýipti joldyń bastalýyn bildiredi.

Bıyl COVID-19 pandemııasy kezinde shekaralardyń jabylýynan Ortalyq Azııadaǵy kóptegen mıgranttar qıyndyqqa tap boldy. Olar jumysqa, tamaqqa, densaýlyq saqtaý júıesine jáne áleýmettik qyzmetterge qol jetkize almaı, kúrdeli jaǵdaıda qaldy.

Mıgranttardyń óz quqyqtary týraly habardar bolýyn arttyrý úshin jáne olar kezigetin qıyndyqtarǵa nazar aýdarý úshin Ortalyq Azııadaǵy qaýipsiz kóshi-qon jobasy Qazaqstan halqyn mıgranttarǵa qasań stereotıpter prızmasynan emes, adam quqyqtarynyń qaǵıdattary men normalary arqyly qaraýǵa shaqyrady. Naýqan 18-25 jeltoqsan kúnderi ótedi jáne onda áleýmettik jelilerdegi kóshbasshylarmen túrli is-sharalar júrgiziledi.

Naýqanǵa barlyq adamdar qosyla alady jáne #MyRavny, #Myvsemıgranttar, aǵylshyn tilinde #WeEqual jáne #WeAllMigrants heshtegteri arqyly óz oqıǵalaryn jaza alady.