USAID: 2024 jyly Qazaqstan AQSh-tan qansha kómek aldy
ASTANA. KAZINFORM – Qazaqstan AQSh-tyń halyqaralyq damý agenttiginen (USAID) 2024 jyly elimizdi qarjylandyrýǵa 10 mıllıon dollardan az qarajat alǵan. Bul týraly Finprom.kz. jazdy.

2025 jyldyń qańtarynda AQSh prezıdenti Donald Tramp ákimshiligi 90 kúndik tekserý úshin USAID arqyly beriletin sheteldik kómekterdiń barlyǵyn derlik toqtatty. Bul qarjylandyrýdyń jańa «amerıkandyq múddelerge» baǵyttalǵan saıasatqa sáıkes kelýin qamtamasyz etý úshin jasaldy.
USAID álemdegi eń iri qarjylyq donor bolyp tabylady, 2014 jyldan 2024 jylǵa deıin agenttik tólemderi 280,9 mıllıard dollardy qurady.
2024 jyly USAID tólemderin eń kóp alýshy Ýkraına boldy: $5,4 mlrd. Reseımen soǵys bastalǵannan beri kómektiń jalpy somasy 30 mıllıard dollardan asty, al buryn tólemder jylyna 224 mıllıon dollardan aspaıtyn. Ýkraınadan keıin Iordanııa, Efıopııa jáne Kongo Demokratııalyq Respýblıkasy tur: ár elde $1,2 mlrd.
Ortalyq Azııa men EAEO elderi arasynda 2024 jyly USAID tólemderiniń eń kóp kólemi Tájikstanǵa tústi: $60,3 mln. Ekinshi orynda Armenııa: 55,1 mıllıon dollar. Sondaı-aq Ózbekstanǵa (40,3 mıllıon dollar), Qyrǵyzstanǵa (35,5 mıllıon dollar) jáne Belorýssııaǵa (30 mıllıon dollar) qomaqty somalar jóneltildi. Eń az tólemderdi Túrikmenstan (2,9 mln dollar) men Reseı (451,2 myń dollar) aldy.
Qazaqstan úshin tólem kólemi nebári 9,5 mıllıon dollardy qurady. Degenmen, bul 2023 jylmen salystyrǵanda 28,9%-ǵa artyq. Bul somanyń jartysyna jýyǵy negizgi densaýlyq saqtaý salasyna (4,8 mln dollar) bólingen. Sondaı-aq memlekettik basqarý men azamattyq qoǵamdy qoldaýǵa (2 mln dollar), onyń ishinde adam quqyqtaryn qorǵaýǵa (510 myń dollar) jáne BAQ pen erkin aqparat aǵynyn damytýǵa (340 myń dollar) qomaqty qarajat bólindi.
Sońǵy 10 jylda Qazaqstan USAID-ten 151,8 mln dollar alǵany atap ótildi.
Eske sala keteıik, buǵan deıin AQSh USAID baǵdarlamasynyń 83% jabatynyn jazǵan bolatynbyz.