US Open: irikteý týrnırinde Juqaev pen Skatov ózara kezdesedi

ASTANA. KAZINFORM — Qazaqstandyqtar 23 jastaǵy Beıbit Juqaev pen Tımofeı Skatov AQSh ashyq chempıonatynyń irikteý saıysyn jeńispen bastady.

Atalmysh jarysqa alǵash ret qatysyp jatqan, dúnıejúzilik reıtıngide 218-orynda turǵan Beıbit álemniń 165-raketkasy, shveıtsarııalyq, 28 jastaǵy tisqaqqan oıynshy Mark-Andrea Hýslermen kúsh synasty.

Birinshi partııada Juqaev taı-breıkte ábjildik tanytty – 7:6 (7:5).

Ekinshi sette 2:0 esebimen alǵa shyqqan Aqtaý tennıs mektebiniń túlegi sol basymdylyǵyn saqtap qaldy – 6:4.

Bir saǵat 37 mınýtqa sozylǵan báseke barysynda Beıbit 11 eıs jasap, 2 breık-poınttan shashaý shyǵarǵan joq. Hýsler eıs sanyn 9-ǵa jetkizgenimen, 1 breıkpen (8 breık-poınt) shekteldi.

Taǵy bir qazaqstandyq, reıtıngide 190-satydaǵy Tımofeı Skatov ózinen 11 jasqa úlkendigi bar, álemniń 128-raketkasy, argentınalyq Fakýndo Banıspen synǵa tústi.

Birinshi partııada tájirıbeli Banıs taı-breıkte tarazy basyn ózine aýdardy – 7:6 (7:5).

Ekinshisinde Skatov ese qaıyrdy – 7:6 (7:4).

Úshinshi, sheshýshi sette Tımofeı 5:1 esebimen alǵa ketti. Sosyn matchty taǵy bir breıkpen túıindedi – 6:1.

Eki saǵat 52 mınýtqa sozylǵan tartysty matchta qazaqstandyq sportshy 7 eıspen birge 14 breık-poınttyń altaýyn paıdalandy. Banıs 7 eıs, 3 breıkpen (5 breık-poınt) kózge tústi.

Osylaısha, irikteý saıystarynyń jartylaı fınalynda B.Juqaev pen T.Skatov ózara kezdesip, kim myqtyny anyqtaıdy. Jeńgeni irikteý týrnıriniń fınalyna shyǵady.

Ótken jyly Tımofeı Skatov irikteýden sátti ótip, AQSh chempıonatynyń alǵashqy aınalymyna deıin jetken.

Eske sala keteıik, budan buryn ıÝlııa Pýtıntsevanyń álemdik reıtıngide birden 199 satyǵa kóterilgenin jazǵan bolatynbyz.

Sondaı-aq Anna Danılına Meksıkadaǵy jarystyń shırek fınalyna joldama aldy.