US Open: Elena Rybakına tórtinshi aınalymǵa shyǵa almady

E.Rybakına úshinshi aınalymda dodanyń ortalyq kortynda álemniń burynǵy birinshi raketkasy, qazirgi kezde reıtıngte 13-orynda turǵan «Úlken dýlyǵa» dodasynyń eki márte jeńimpazy, rýmynııalyq Sımona Haleppen kúsh synasty.

Qarsylastar buǵan deıin eki márte kezdesken edi. Budan eki jyl buryn Ýhanda (Qytaıda) ótken jarysta birinshi sette esep 4:5 bolǵan kezde Halep jaraqatyna baılanysty oıyndy jalǵastyra almaǵan bolatyn. Esesine ótken jyly aqpanda Dýbaıdaǵy týrnırdiń fınalynda S.Halep 3:6, 6:3, 7:6 (7:5) esebimen ese qaıyrǵan-dy.

Bul joly birinshi partııada qazaqstandyq tennısshi alǵa ketkenimen, Halep kambek jasady. Sosyn asa tartysty taı-breıkte sheberlik tanytty – 7:6 (13:11).

Ekinshi sette de E.Rybakına 3:0 esebimen alǵa shyqqanymen, rýmynııalyq sportshy tarazy basyn taǵy teńestirdi – 3:3. Esep 4:4 bolǵan mezette Elena taǵy bir breık jasap, setti eıspen bitirdi – 6:4.

Úshinshi, sheshýshi partııa basynda Rybakına breık jasaǵanymen, tájirıbesi mol Halep sol boıda qarymta qaıyrdy – 1:1. Qazaqstandyq tennısshiniń sharshaǵanyn ári urymtal sátterdi tıimdi paıdalanǵan ol esepti 4:1-ge jetkizdi. Sosyn matchqa dop bergende, qatelesken joq – 6:3.

Eki saǵat jarymǵa jýyq ýaqytqa sozylǵan tartysty básekede E.Rybakına 14 eıs jasap, 11 breık-poınttyń jeteýin óz esebine jazdy. Qarsylasy 1 eıs, 7 breıkke (10 breık-poınt) qol jetkizdi.

S.Halep shırek fınalǵa shyǵý úshin álemniń 5-raketkasy, ýkraınalyq Elına Svıtolına nemese reıtıngte 27-satydaǵy reseılik Darıa Kasatkınanyń bireýimen talasady.

Osylaısha AQSh ashyq chempıonatynda jekeleı synda Qazaqstannan eshkim qalmady.

Eske sala keteıik, budan buryn Elena Rybakınanyń US Open týrnıriniń úshinshi aınalymyna shyqqanyn, al Aleksandr Býblıktiń bes sette sozylǵan matchta jeńilip qalǵanyn jazǵan bolatynbyz.

Sondaı-aq Qazaqstan balalar quramasy Azııa komandalyq birinshiliginiń fınal kezeńine joldama aldy.