US Open: Elena Rybakına úshinshi aınalymǵa joldama aldy

ASTANA. KAZINFORM – Qazaqstannyń birinshi, álemniń 10-raketkasy Elena Rybakına AQSh ashyq chempıonatynyń úshinshi aınalymyna shyqty. 

Qazaqstandyq tennısshi ekinshi kezdesýin dúnıejúzilik reıtıngide 96-orynda turǵan chehııalyq, 18 jastaǵy Tereza Valentovamen ótkizdi.

T. Valentova – ótken jyly jasóspirimder arasynda Rolan Garros týrnırinde jekeleı jáne juptyq synda top jaryp, tennıs áleminde tanylyp úlgergen jas sportshy.

Birinshi partııada Rybakına 6:3 esebimen basymdylyq tanytty. Tartysty órbigen ekinshi setti Elena jeńispen túıindedi – 7:6 (9:7).

Bir saǵat 41 mınýtqa sozylǵan báseke barysynda Rybakına 4 eıspen birge 7 breık-poınttyń tórteýin óz esebine jazdy. Valentova 2 eıs, 3 breıkpen (9 breık-poınt) kózge tústi.

Elena Rybakına tórtinshi aınalymǵa shyǵý úshin álemniń 36-raketkasy, 2021 jylǵy AQSh chempıony, 22 jastaǵy ulybrıtanııalyq Emma Radýkanýmen talasady.

Eske sala keteıik, budan buryn AQSh ashyq chempıonatynda Elena Rybakınanyń 16 jastaǵy tennısshini jeńgenin jazǵan edik. 

Aleksandr Býblık AQSh chempıonyn jarys jolynan taıdyrdy. Býblık ekinshi aınalymda álemdik reıtıngide 96-satydaǵy aýstralııalyq Trıstan Skýlkeıtpen oınaıdy.