US Open: Elena Rybakına AQSh chempıonyn oısyrata utyp, tórtinshi aınalymǵa shyqty

ASTANA. KAZINFORM — Qazaqstannyń birinshi, álemniń 10-raketkasy Elena Rybakına AQSh ashyq chempıonatynyń tórtinshi aınalymyna ótti.

Qazaqstandyq tennısshi úshinshi aınalymda álemniń 36-raketkasy, budan tórt jyl buryn aıdy aspanǵa shyǵaryp, 18 jasynda AQSh chempıony atanǵan ulybrıtanııalyq Emma Radýkanýǵa tap keldi.

Osyǵan deıin qarsylastar bir-aq ret kezdesip, onda Rybakına basym túsken edi. Bul joly Elena birden 3:0 esebimen alǵa ketti. Taǵy bir breıkke qol jetkizip, óz geımin de aldy – 6:1.

Qazaqstandyq sportshy ekinshi setti de breıkpen bastady – 2:0. Sodan keıin esepti 5:2-ge jetkizdi. Matchqa dop bergende, múmkindigin jibergen joq – 6:2. Bir saǵattan sál astam ýaqytqa sozylǵan báseke barysynda Rybakına 2 eıspen birge 9 breık-poınttyń tórteýin óz esebine jazdy. Radýkaný 2 eıspen shekteldi.

Elena Rybakına shırek fınalǵa shyǵý úshin álemniń 8-raketkasy, ıtalııalyq Jasmın Paolını nemese reıtıngide 60-oryndaǵy chehııalyq Marketa Vondroýshovanyń qaı jeńgenimen talasady.

Eske sala keteıik, budan buryn Aleksandr Býblıktiń AQSh ashyq chempıonatynyń úshinshi aınalymyna ótkenin jazǵan edik.